Мажбурий ижро бюроси Тошкент шаҳри Миробод туманида фуқаро фойдасига 700 миллион сўм ундириб берди. Бу ҳақда бюро матбуот хизмати «Дарё»га маълум қилди.
Фуқаролик ишлари бўйича Mirzo Ulugbek туманлараро судининг 26 сентябрдаги ижро варақасига асосан қарздор корхонадан ундирувчи Ш.А. фойдасига бузилиши керак бўлган қурилма эвазига 700 миллион сўм компенсация ундириш тўғрисидаги ижро ҳужжати бўлим иш юритувига келиб тушган.
«Суд ҳужжатлари ва бошқа органлар ҳужжатларини ижро этиш тўғрисида»ги қонуннинг 23-моддасига асосан ижро иши юритишни қўзғатиш тўғрисида қарор қабул қилиниб, қарорда қарздорга ижро ҳужжати талабларини ихтиёрий равишда бажариши учун муддат берилган ва қарор нусхаси тарафларга юборилган.
Қарздор корхона томонидан берилган ихтиёрий муддат ичида ижро ҳужжати қонуний талаблари бажарилмагани сабабли мажбурий ижро этиш чоралари кўрилиб, «МИБ портал» электрон ижро дастури орқали қарздорнинг ҳисоб-рақамларига банд солиниб, инкассо топшириқномаси юборилган.
Мазкур инкассо топширикномасига асосан қарздор корхонадан суд қарорида кўрсатилган қарздорлик суммаси тўлиқ ундирилди ва ижро ҳужжати амалда ижро қилиниб, иши юритиш тамомланди.
Изоҳ (0)