Тошкент шаҳрида 20 апрель куни бўлиб ўтган экоакцияда табиат ресурслари вазири Азиз Абдуҳакимов дарахтларни асраш бўйича фуқаролар ўртасида профилактик ишлар олиб борилаётганини маълум қилди. Бу ҳақда “Дарё” мухбири хабар қилди.
Азиз Абдуҳакимовнинг айтишича, дарахтларга етказилаётган зарар табиий ривожланиш жараёнига салбий таъсир кўрсатмоқда.
“Шаҳримизнинг кўплаб кўча ва маҳаллаларида дарахтларнинг илдизи бетон қопламалар ёки сунъий чим билан ўралгани, дарахтларга тунги ёритиш чироқлари ўрнатилгани ва турли реклама баннерлари осиб қўйилганини кўриш мумкин. Бу дарахт илдизига ҳаво кириш имконини камайтириб, уларнинг шикастланиш ёки нобуд бўлиш хавфини келтириб чиқаради, табиий ривожланиш жараёнига салбий таъсир кўрсатади. Барчадан дарахтлар атрофини бетон билан қопламаслик, баннерлар ва ёритиш мосламалари ўрнатмасликни сўраймиз”, — дейди вазир.
Азиз Абдуҳакимовнинг таъкидлашича, экоакция давомида тадбиркорлар ва маҳаллий фуқароларга дарахтлар парвариши бўйича тушунтириш бериш мақсад қилинган.
“Дарахтлар бу — шаҳримизнинг ўпкаси. Биз ҳозир ўпкамизни ўлдираётгандекмиз гўё. Бу коронавирусдан ҳам баттар касаллик. Шу мақсадда Тошкент шаҳар ҳокимлиги билан семинар ўтказиб, фуқароларга дарахтлар илдиз тизимини тўлиқ бетон, асфалт, сунъий қопламалардан бўшатиш кераклигини, камида 50—60 сантиметр суриш кераклигини тушунтиряпмиз”, — дея қўшимча қилди у.
.jpg)
Маълум қилинишича, Табиат ресурслари вазирлиги ва Тошкент шаҳар ҳокимлиги ташаббуси билан ўтказилаётган “Дарахтларни асрайлик“ экоакцияси бир ой — 20 апрелдан 20 майгача давом этади.
Изоҳ (0)