Toshkent shahrida 20-aprel kuni bo‘lib o‘tgan ekoaksiyada tabiat resurslari vaziri Aziz Abduhakimov daraxtlarni asrash bo‘yicha fuqarolar o‘rtasida profilaktik ishlar olib borilayotganini ma’lum qildi. Bu haqda “Daryo” muxbiri xabar qildi.
Aziz Abduhakimovning aytishicha, daraxtlarga yetkazilayotgan zarar tabiiy rivojlanish jarayoniga salbiy ta’sir ko‘rsatmoqda.
“Shahrimizning ko‘plab ko‘cha va mahallalarida daraxtlarning ildizi beton qoplamalar yoki sun’iy chim bilan o‘ralgani, daraxtlarga tungi yoritish chiroqlari o‘rnatilgani va turli reklama bannerlari osib qo‘yilganini ko‘rish mumkin. Bu daraxt ildiziga havo kirish imkonini kamaytirib, ularning shikastlanish yoki nobud bo‘lish xavfini keltirib chiqaradi, tabiiy rivojlanish jarayoniga salbiy ta’sir ko‘rsatadi. Barchadan daraxtlar atrofini beton bilan qoplamaslik, bannerlar va yoritish moslamalari o‘rnatmaslikni so‘raymiz”, — deydi vazir.
Aziz Abduhakimovning ta’kidlashicha, ekoaksiya davomida tadbirkorlar va mahalliy fuqarolarga daraxtlar parvarishi bo‘yicha tushuntirish berish maqsad qilingan.
“Daraxtlar bu — shahrimizning o‘pkasi. Biz hozir o‘pkamizni o‘ldirayotgandekmiz go‘yo. Bu koronavirusdan ham battar kasallik. Shu maqsadda Toshkent shahar hokimligi bilan seminar o‘tkazib, fuqarolarga daraxtlar ildiz tizimini to‘liq beton, asfalt, sun’iy qoplamalardan bo‘shatish kerakligini, kamida 50—60 santimetr surish kerakligini tushuntiryapmiz”, — deya qo‘shimcha qildi u.
.jpg)
Ma’lum qilinishicha, Tabiat resurslari vazirligi va Toshkent shahar hokimligi tashabbusi bilan o‘tkazilayotgan “Daraxtlarni asraylik“ ekoaksiyasi bir oy — 20-apreldan 20-maygacha davom etadi.
Izoh (0)