Хорижда муваффақиятга эришган ватандошлар ҳақида ҳикоя қилувчи “Ўзбекистонлик” фильми учун рэпер Конста томонидан саундтрек куйланди. 18 апрель куни клипи билан биргаликда премьера қилинган ушбу қўшиқ бир кунда YouTube тармоғида 100 минг марта кўрилди.
Конста тахаллуси билан ижод қилувчи хонанда “Ўзбекистонлик” фильмидан илҳомлангани ва шу мақсадда бу қўшиқни ёзганини маълум қилган. У ижод маҳсули ўзининг ҳаётини акс эттирганини ҳам билдирган.
“Ўзбекистонлик фильмини томоша қилганимда у ердаги қаҳрамонларни кўриб, ўзимнинг бошимдан ўтказганларим ёдимга тушиб кетди. 2012 йилда 250 минг сўмга етти суткалаб йўл босиб, Россияга етиб борган бола, орзулари бир дунё, лекин яшаш учун пул топиши керак бўлган, резинадек чўзиладиган квартираларда яшаб юрган йигит муваффақиятга эришгунига қадар қандай қийинчиликларни босиб ўтиш мумкинлигини яхши тушунаман.
Шу сабабдан фильмда кўтарилаётган ғоя руҳиятимга жуда яқин эди. Улар ўз мақсадларига етгунига қадар ҳар қандай қийинчиликларга қарамасдан, олға боришган, синовлар уларни янада кучлироқ қилган.
Яқинда лойиҳа ижодкорлари билан “Ўзбекистонлик” фильмининг ўзига хос мадҳиясини яратиш фикри туғилди. Фикримиз бир жойдан чиқди. Улар бу ғояни қўллаб-қувватлашди ва якунда янги трек дунёга келди. Қўшиқ кечаги ва бугунги мен, сиз, биз ҳақимизда. Мақсадга етгунича ҳеч қачон тўхтамаслик керак экани, улар ёлғиз эмаслигини шу трек орқали етказиб беришга ҳаракат қилдик. Лойиҳанинг асосий ғояларидан бири ҳам аслида шундай”, — деб ёзган у ижтимоий тармоқдаги саҳифаси орқали.
Ушбу қўшиқ ва клипни сиз ҳам томоша қилишингиз мумкин.
Изоҳ (0)