Андижонда туман ҳокимлиги мутахассиси 200 доллар пора олаётганда қўлга тушди

Андижон тумани ҳокимлиги етакчи мутахассиси ҳокимлик биноси олдида 200 АҚШ долларини олаётганда қўлга олинди. Бу ҳақда “Дарё” манбаси хабар бермоқда.

Таъкидланишича, Андижон туман ҳокимлиги оила ва хотин-қизлар бўлими етакчи мутахассиси Ф.А. хизмат мавқейидан фойдаланиб, фуқаро Х.К.ни алдаб, уни тумандаги маҳаллалардан бирига ўзининг ёрдами билан хотин-қизлар фаоли вазифасига ишга киргизганини айтиб, эвазига 500 АҚШ доллари талаб қилган. Шундан сўнг Х.К. ушбу ҳолат юзасидан ҳуқуқни муҳофаза қилувчи органларга мурожаат қилган. Унинг мурожаатига асосан тезкор тадбир ўтказилганида Ф.А. талаб қилинган пуллар ҳисобидан 200 АҚШ долларини туман ҳокимлиги биноси олдида олган вақтида далилий ашёлар билан ушланган.

Ҳолат бўйича Жиноят кодексининг 210 ёки 168-моддаси бўйича иши қўзғатилган бўлиши мумкин.

Аввалроқ Избоскан тумани ҳокими ўринбосари 500 доллар пора олаётганида қўлга тушгани ҳақида хабар қилинганди.