Xorijda muvaffaqiyatga erishgan vatandoshlar haqida hikoya qiluvchi “O‘zbekistonlik” filmi uchun reper Konsta tomonidan saundtrek kuylandi. 18-aprel kuni klipi bilan birgalikda premyera qilingan ushbu qo‘shiq bir kunda YouTube tarmog‘ida 100 ming marta ko‘rildi.
Konsta taxallusi bilan ijod qiluvchi xonanda “O‘zbekistonlik” filmidan ilhomlangani va shu maqsadda bu qo‘shiqni yozganini ma’lum qilgan. U ijod mahsuli o‘zining hayotini aks ettirganini ham bildirgan.
“O‘zbekistonlik filmini tomosha qilganimda u yerdagi qahramonlarni ko‘rib, o‘zimning boshimdan o‘tkazganlarim yodimga tushib ketdi. 2012-yilda 250 ming so‘mga yetti sutkalab yo‘l bosib, Rossiyaga yetib borgan bola, orzulari bir dunyo, lekin yashash uchun pul topishi kerak bo‘lgan, rezinadek cho‘ziladigan kvartiralarda yashab yurgan yigit muvaffaqiyatga erishguniga qadar qanday qiyinchiliklarni bosib o‘tish mumkinligini yaxshi tushunaman.
Shu sababdan filmda ko‘tarilayotgan g‘oya ruhiyatimga juda yaqin edi. Ular o‘z maqsadlariga yetguniga qadar har qanday qiyinchiliklarga qaramasdan, olg‘a borishgan, sinovlar ularni yanada kuchliroq qilgan.
Yaqinda loyiha ijodkorlari bilan “O‘zbekistonlik” filmining o‘ziga xos madhiyasini yaratish fikri tug‘ildi. Fikrimiz bir joydan chiqdi. Ular bu g‘oyani qo‘llab-quvvatlashdi va yakunda yangi trek dunyoga keldi. Qo‘shiq kechagi va bugungi men, siz, biz haqimizda. Maqsadga yetgunicha hech qachon to‘xtamaslik kerak ekani, ular yolg‘iz emasligini shu trek orqali yetkazib berishga harakat qildik. Loyihaning asosiy g‘oyalaridan biri ham aslida shunday”, — deb yozgan u ijtimoiy tarmoqdagi sahifasi orqali.
Ushbu qo‘shiq va klipni siz ham tomosha qilishingiz mumkin.
Izoh (0)