Эроннинг қувғиндаги валиаҳд шаҳзодаси Ризо Паҳлавий шу ҳафта Исроилга ташриф буюриши режалаштирилган. Бу ҳақда Associated Press хабар берди.
Маълум қилинишича, ташриф Паҳлавий отасининг бир вақтлар Исроил билан бўлган илиқ алоқалари ҳамда Исроил ва Ислом Республикаси ўртасидаги ҳозирги душманлик ҳолатини акс эттиради.
“Исроил халқи шуни билишини истардимки, Ислом Республикаси Эрон халқини ифодаламайди. Халқларимиз ўртасидаги қадимий алоқалар ҳар икки миллат манфаати учун қайта тикланиши мумкин”, — деб ёзади Ризо Паҳлавий.
1979 йилги Ислом инқилобидан олдин Эронни бошқарган сўнгги шоҳнинг ўғли Паҳлавий учрашувда “Эрон халқидан дўстлик хабарини” етказишини айтди.
The Times of Israel нашрининг ёзишича, у Исроилда ҳар йили ўтказиладиган Холокостни хотирлаш маросимида қатнашмоқчи. Паҳлавийни Исроил разведка вазири Гила Гамлиэл кутиб олади.
Гамлиэл Паҳлавийнинг Исроилга биринчи ташрифини амалга ошириш ҳақидаги “дадил қарори”ни олқишлаган.
“Валиаҳд шаҳзода Эронни бошқараётган экстремистлардан фарқли ўлароқ, Оятулло режимидан фарқ қиладиган ва тинчлик, бағрикенглик қадриятларини қўллаб-қувватлайдиган етакчилик тимсолидир”, — деган у.
Паҳлавий 17 ёшида саратон касаллигига чалинган отаси Муҳаммад Ризо Паҳлавий қувғинда тахтни тарк этишидан бироз олдин АҚШдаги ҳарбий мактабда ўқиш учун Эрондан кетган.
1979 йилда Эрон инқилоби етакчиси Оятулло Ҳумайний Исроилни “Ислом душмани” деб эълон қилган ва у билан барча алоқаларни узган. Бугун мамлакатлар қасамёдли душман. Исроил Эронни ўзининг энг катта таҳдиди деб ҳисоблайди. Буни мамлакатнинг Исроилни йўқ қилишга чақираётгани, Исроил чегараларидаги душман жангари гуруҳларни қўллаб-қувватлаши ва ядровий дастури билан изоҳлайди. Эрон Исроил ва унинг Ғарб иттифоқчиларининг ядровий бомба яратишда айбловларини рад этади.
Изоҳ (0)