Россия президенти Владимир Путин оккупация қилинган Херсон ва Луганск халқ республикасига ташриф буюрди. Украина президенти офиси мазкур ташрифга муносабат билдирди.
Владимир Зеленский офиси раҳбари маслаҳатчиси Михаил Подоляк Путиннинг Украина ҳудудларига ташрифини баҳолади.
“Путиннинг эволюцияси (деградацияси) таъсирли. Бир йил олдин дунё унинг баёнотларини кутаётган эди. У нима дейди? Нима қилади? Бугун эса дунё бефарқ”, — деди Подоляк.
Сиёсатчи дунё учун энди Россия президенти каби сиёсий субъект мавжуд эмаслигини билдирди. Подоляк Путиннинг Украинанинг босиб олинган ҳудудларига сафарини “оммавий қотиллик муаллифининг махсус саёҳати” деб таърифлади. Россия президенти бундай ташрифни “жиноятлардан завқ олиш” учун амалга ошириши таъкидланди.
Путиннинг Украинанинг икки вилоятига ташрифи
18 апрель куни Россия матбуоти Владимир Путиннинг Херсон йўналишидаги “Днепр” қўшинлари гуруҳи штаб-квартирасига ташриф буюргани ҳақида хабар берди. Россия президенти гуруҳ қўмондони, генерал-полковник Олег Макаревич ва Россия ҳаво-десант кучлари қўмондони, генерал-полковник Михаил Теплинскийнинг ҳисоботларини тинглади.
Ижтимоий тармоқларда Россия президенти сафаридан видео эълон қилинди.
Худди шу куни Украина раҳбари Владимир Зеленский Украина қуролли кучларининг Донецк вилояти Авдеевкадаги олдинги позицияларига ташриф буюрди. “Қаҳрамонларимиз ёнида эканлигимдан фахрланаман”, — деди Зеленский.
Путиннинг босиб олинган Мариуполга ташрифи
19 март куни Путин Мариуполга вертолётда ташриф буюриб, шундан сўнг у шаҳарнинг бир қанча туманларини машинада айланиб чиққанди.
Невский микрорайонида у шаҳар аҳолиси билан суҳбатлашган, шунингдек, қирғоқ бўйи, яхта-клуб ҳудуди, шаҳарнинг тарихий жойларини бориб кўрган. Шундан сўнг у Ростов-Донга жўнаб, у ердаги “махсус ҳарбий операция” қўмондонлик пунктида йиғилиш ўтказган.
Украина президенти офиси раҳбари маслаҳатчиси Михаил Подоляк Путиннинг аннексия қилинган Мариуполга ташрифи ҳақида фикр билдирган. У “жиноятчи ҳар доим жиноят содир бўлган жойга интилишини” қайд этган.
“Цивилизациялашган дунё мамлакатлари ъуруш режиссёриъ (Путин) чегарани кесиб ўца, ҳибсга олинишини эълон қилаётган бир пайтда, минглаб Мариупол оилаларининг қотиллик ташкилотчиси шаҳар вайроналари ва оммавий қабрларни томоша қилиш учун келди”, — деган Подоляк.
Украина Мудофаа вазирлиги эса “Путин худди ўғридек тунда Мариуполга ташриф буюрганини” қайд этган. Айримлар Путиннинг Мариуполга ташрифини Халқаро жиноий суднинг уни ҳибсга олиш ордерига жавоб эканини билдирган.
Кремль матбуот котиби Дмитрий Песков эса Россия президенти рус ҳарбийлари томонидан босиб олинган Мариуполга унинг қайта тикланганига ишонч ҳосил қилиш учун борганини айтган.
Изоҳ (0)