Вашингтон ва Киев Украинада мини АЭС қурилиши ҳақида эълон қилди

Киев ва Вашингтон Украина ҳудудида кичик модулли реактор қуришни режалаштирмоқда. Бу ҳақда Украинанинг АҚШдаги элчиси Оксана Маркарова маълум қилди.

«Бугун БМТнинг иқлим бўйича 27-конференцияси доирасида АҚШ президентининг иқлим бўйича махсус вакили Жон Керри ва Украина энергетика вазири Герман Галушенко Украинада кичик модулли реактор қуриш бўйича тажриба лойиҳаси бошланганини эълон қилди», — деб ёзди у ўзининг Facebook саҳифасида.

Маркарованинг сўзларига кўра, лойиҳа иштирокчилари АҚШнинг Аргон миллий лабораторияси халқаро консорсиуми, Украинанинг «Энергоатом» компанияси, Украина Миллий хавфсизлик ва мудофаа кенгаши ҳамда Украина Ядро ва радиациявий хавфсизлик давлат илмий-техника маркази бўлади. Бошқа хусусий шериклар қаторига Clark Seed, Doosan Enerbility, FuelCell Energy, IHI Corporation, JGC Corporation, Samsung C&Т Corporation ва Starfire Energy компаниялари киради.

Кичик модулли реакторлар атом электр станцияларига ўрнатиладиган реакторлардан нисбатан кичик ва кучсизроқ бўлади. Кичик модулли реакторларнинг афзаллиги шундаки, уларни бир жойдан иккинчи жойга кўчириш ва одатий АЭС учун мос бўлмаган жойларга ўрнатиш мумкин.