Ўзбекистон ҳукумати ва Жаҳон банки ўртасида энергия самарадорлигини ошириш ва мамлакатдаги деградацияга учраган ўрмон ерларини тиклаш бўйича 296 млн долларлик шартномалар имозланди. Бу ҳақда “Дарё”га Жаҳон банкининг Ўзбекистондаги ваколатхонаси хабар бермоқда.
Маълум бўлишича, Ўзбекистонга жамоат биноларининг энергия самарадорлигини ошириш лойиҳасини молиялаштириш ва қурилиш секторида “яшил” энергияга инвестицияларни жалб қилиш бўйича институционал ва норматив-ҳуқуқий базани ишлаб чиқиш учун 143 млн доллар имтиёзли кредит ажратилади.
Шунингдек, Ўзбекистонга мамлакатнинг турли ҳудудларида ландшафтлар барқарорлигини ошириш ва ўрмонларни қайта тиклашга, шунингдек, Ўзбекистоннинг трансчегаравий табиий зоналарни тиклаш бўйича Марказий Осиёдаги бошқа давлатлар билан ҳамкорлигини ривожлантиришга кўмаклашиш учун 142 миллион доллар миқдорида имтиёзли кредит ажратилади.
Бундан ташқари ушбу масалалар бўйича яна 11 млн долларлик грант маблағлари ҳам ажратилган.
Қайд этилишича, ушбу лойиҳалар бўйича имтиёзли молиялаштириш Ўзбекистон ҳукуматига Халқаро тараққиёт ассоциацияси (Жаҳон банки гуруҳи таркибига кирувчи) томонидан паст фоиз ставкасида, 30 йил муддатга, шу жумладан беш йиллик имтиёзли давр билан тақдим этилади.
Изоҳ (0)