Ўзбекистоннинг “Оҳангаронцемент” заводи АҚШнинг санкцияларига учради. Бу ҳақда мамлакат Молия вазирлиги хабар берди.
Маълумотларга кўра, Алишер Усмоновнинг USM холдинги томонидан ташкил этилган Аkkermann Cement CА ҳам чекловлар остида қолди.
2021 йил май ойида Кипрда рўйхатдан ўтган Lamanka enterprises компанияси “Оҳангаронцемент” акцияларининг 84,2 фоизини 557,6 миллиард сўмга сотиб олган.
2022 йил январь ойида Британия Виржиния оролларининг Lamanka Enterprises ва Giasinttar компаниялари ўз акцияларини 1,88 триллион сўмга сотгани эълон қилинганди.
Кейинчалик акцияларнинг харидори Алишер Усмоновнинг USM холдинги томонидан яратилган Аkkermann Cement CА эканлиги маълум бўлди.
АҚШ Молия вазирлигининг таъкидлашича, Усмоновнинг оффшор бизнесларининг кенг тармоғи бор ва у ўз оила аъзоларидан молиявий операциялар учун ҳам фойдаланиши мумкин. Бу эса унга санкцияларни четлаб ўтиш имконини беради.
АҚШнинг Чет эл активларини назорат қилиш бошқармаси янги санкция рўйхатидаги айрим компаниялар, жумладан Аkkermann Cement CА билан операцияларни 11 июлга қадар бекор қилиш учун лицензия берди.
Бундан ташқари, Алишер Усмонов холдингига кирувчи “Металлоинвест”, “USM Telecom” ва “Мегафон” ҳам санкциялар остида қолди.
Чекловлар, шунингдек, “Металлоинвест” таркибига кирувчи компанияларга ҳам киритилди: Михайловский кон-қайта ишлаш комбинати, Лебединский GOК ва ОЭМК.
USM холдинг изоҳи
USMнинг санкциялар бўйича вакили холдингга нисбатан санкциялар қўллангани ҳақида “Дарё”га изоҳ берди.
Биз АҚШ томонидан USM холдинги, унинг шўба корхоналари, уларнинг раҳбарияти, шунингдек, Алишер Усмонов ва бошқа акциядорларнинг қариндошларига нисбатан жорий этилган чекловларни адолатсиз ва асоссиз деб ҳисоблаймиз, — дея таъкидлади компания.
Хабарда айтилишича, Алишер Усмонов узоқ вақтдан бери тадбиркорлик фаолияти билан шуғулланмаган, холдингнинг 50 фоиздан кам қисмига эгалик қилади ва уни бошқаришда иштирок этмайди.
Алоҳида таъкидлаб ўтамизки, рўйхатларга қариндошларнинг киритилиши ахлоқсиз амалиёт, гаровга олишни эслатади. Ушбу чекловлар ноқонуний деб эътироз билдирилади, — дейилади шарҳда.
“Оҳангаронцемент” заводи ҳақида
“Оҳангаронцемент” заводи 20-аср ўрталарида ташкил этилган бўлиб, 1970 йилда завод, 1980 йилда ишлаб чиқариш бирлашмасига айланган. 1994 йилда хусусийлаштирилиб, акциядорлик жамиятига айлантирилган.
Узоқ вақт давомида корхонанинг асосий эгаси Zeromax бўлган. 2006 йилда Россиянинг “Евроцемент” компанияси ундан 75,5 фоиз улушни сотиб олди. Кейинчалик бу улуш 83,9 фоизга етказилди.
Изоҳ (0)