Тошкент шаҳар ЙҲХБ ўтказган 270 млн сўмлик тендерда бир тадбиркор иккита корхона билан қатнашиб, ғолиб бўлди
Тошкент шаҳар Йўл ҳаракати хавфсизлиги бошқармасининг махсус эксплуатация-монтаж бўлими томонидан 17—28 март кунлари светофор учун бошқарув таъминоти харид қилиш бўйича тендер ўтказилди. “Дарё” мухбири ҳужжатларни мониторинг қилиш давомида шубҳали ҳолатни аниқлади.
Лот маълумотларига кўра, тендернинг бошланғич нархи — 270 миллион сўм. Ғолиб тадбиркор ЙҲХБга светофор чироқлари ўчиб-ёнишини мувофиқлаштириб турувчи 30 та мослама (УК5МП4 контроллери) етказиб бериши назарда тутилган.
Тендерда иккита тадбиркорлик субъекти иштирок этди. Булар:
- Svetokont МЧЖ;
- “Манзара-Электроника” МЧЖ.
Харид комиссияси аъзоларининг умумий баҳоларига кўра, тендерни 92 га 84 ҳисоби билан “Манзара-Электроника” корхонаси ютиб олди. Svetokont эса захира етказиб берувчи этиб белгиланди.
Тендер иштирокчиларининг раҳбарияти билан танишиш жараёнида шубҳали ҳолатга дуч келдик.
Статистика агентлиги маълумотларига кўра, “М.-Э.” МЧЖнинг уч нафар таъсисчиси бор. Улар орасида корхонага раҳбарлик қилувчи Ветошкин Анатолий Петрович ҳам мавжуд.
Қизиғи шундаки, айнан шу инсон тендерда “М.-Э.“га рақобат таклиф этиши кутилган Светоконт МЧЖнинг ҳам ягона таъсисчиси ва раҳбари ҳисобланади.
Аммо “Давлат харидлари тўғрисида”ги қонуннинг 68-моддасига кўра, тендер иштирокчиси фақат битта таклиф беришга ҳақли.
Масъуллардан ушбу шубҳали тендер натижаларига эътибор қаратишни сўраймиз.
