“Тошкент ҳалқа автомобиль йўлларидан фойдаланиш участка бошқармаси” унитар корхонаси буюртмачилигида ўтказилган тендер натижалари бекор қилинди. Бу ҳақда Коррупцияга қарши курашиш агентлиги хабар берди.
Қайд этилишича, мазкур унитар корхона томонидан 31 март куни 2 та лот бўйича ўтказилган 3 миллиард 220 миллион сўмлик давлат харидида “Давлат харидлари тўғрисида”ги қонуннинг 10-моддаси (рақобат ва холислик принципи), 14-моддаси (манфаатлар тўқнашуви), 46-моддаси (давлат харидлари жараёнидаги чекловлар) талаблари бузилганлиги ва бошқа қонунбузилиш ҳолатларига йўл қўйилгани аниқланган.
Хусусан, 2 та лот бўйича харидда иштирок этган 2 нафар тадбиркорнинг ҳужжатлари харид комиссиясининг котиби фойдаланган компьютернинг IP-манзили орқали электрон платформага юкланган.
Шунингдек, ўтказилган ушбу давлат харидида харид комиссия раиси ва аъзоларининг иштирокисиз, бошқа шахс томонидан уларнинг электрон рақамли имзолари орқали харид натижалари баҳолангани ва имзолангани маълум бўлган.
Мазкур ҳолатлар бўйича 3 апрель куни харид комиссиясининг баённомасини бекор қилиш тўғрисида буюртмачига тақдимнома киритилган ва қонуний чора кўриш учун тўпланган ҳужжатлар Бош прокуратура ҳузуридаги Иқтисодий жиноятларга қарши курашиш департаментига юборилган ҳамда ҳолат бўйича хизмат текшируви ўтказиш учун Автомобиль йўллари қўмитасига сўровнома киритилган.
Агентликнинг тақдимномасига биноан “Тошкент халқа автомобиль йўлларидан фойдаланиш участка бошқармаси” унитар корхонаси томонидан 4 апрель куни харид комиссиясининг баённомаси бекор қилинган.
Аввалроқ Урганч шаҳар ихтисослаштирилган санъат мактаб-интернати буюртмачилигида иссиқ овқат билан таъминлаш бўйича ўтказилган 731 миллион сўмлик, Асака туманида эса тиббиёт бирлашмаси ўтказган 620 миллион сўмлик тендерлар бекор қилинганди.
Изоҳ (0)