Франциянинг Ўзбекистондаги элчиси Аурелиа Боучез ва Ўзбекистон энергетика вазири Жўрабек Мирзамаҳмудов ўртасида учрашув бўлиб ўтди. Бу ҳақда Энергетика вазирлиги матбуот хизмати хабар берди.
Учрашувда Ўзбекистон ва Франция ўртасида 2022 йилда амалга оширилган ишлар ҳамда юқори даражада ташкиллаштирилган давлат ташрифи натижалари алоҳида таъкидлаб ўтилган. Шунингдек, Франция компаниялари иштирокида амалга оширилаётган лойиҳаларнинг жорий ҳолати муҳокама қилинган. Хусусан:
- EDF компанияси билан ҳамкорликда Сирдарё ИЭС, Қамбарота ва Чотқол ГЭСлари лойиҳалари доирасида амалга оширилаётган ишлар, шунингдек, бино ва иншоот томларига қуёш батареяларини ўрнатиш;
- Total Eren компанияси томонидан 2022 йил май ойида Самарқанд вилоятида қуввати 100 МВт бўлган қуёш электр станцияси муваффақиятли ишга туширилгани, шунингдек, Самарқанд ва Қашқадарё вилоятларида қурилиши режалаштирилган янги станцияларга қизиқиш билдираётгани;
- Voltalia компанияси Хоразм вилоятида қуёш фотоэлектр станцияси қуриш лойиҳаси тендерида ғолиб бўлиб, ҳамкорлик алоқаларини бошқа йўналишларда ҳам кенгайтириш юзасидан амалий ишларни олиб бораётгани қайд этилган.
Учрашув давомида томонлар Technip Energies компанияси билан ҳамкорлик истиқболларини ҳам муҳокама қилган. Томонлар нафақат газ узатиш тизимини модернизация қилиш соҳасида, балки ёқилғи-энергетика комплексининг бошқа йўналишларида ҳам лойиҳалаш хизматларини кўрсатувчи қўшма корхона ташкил этиш мақсадга мувофиқлигини қайд этган.
Томонлар атом энергетикаси соҳасидаги ҳамкорлик имкониятларини ҳам муҳокама қилиб, Framatome ва Assystem компанияларининг қизиқишларини таъкидлаб ўтди.
Учрашув якунлари бўйича хорижий томонга Voltalia компанияси томонидан Агроволтаика соҳасида лойиҳани амалга ошириш ва Assystem билан смарт-грид тизимини жорий этиш бўйича ҳамкорликни йўлга қўйиш имкониятларини кўриб чиқиш таклиф этилган.
Аввалроқ Инвестициялар, саноат ва савдо вазирлигининг ташкилий кўмагида Ўзбекистон ва Хитой ҳудудлари ўртасида энергетика ва савдо соҳаларида ҳамкорлик тўғрисидаги икки томонлама шартномаларни имзолаш маросими бўлиб ўтганди.
Изоҳ (0)