Тошкент вилоятида бир қизни зўрлаганликда гумон қилинган Миллий гвардия Қўриқлаш бош бошқармаси ходимига нисбатан жиноят иши қўзғатилди. Бу ҳақда идора матбуот хизмати хабар берди.
Қайд этилишича, М.Н. исмли фуқаронинг Тошкент вилояти Қўриқлаш бўлими сафдор ходими Ш.Ш.га нисбатан аризаси Миллий гвардияга “Nemolchi.uz.” лойиҳаси фаоли томонидан юборилган. Мазкур аризада фуқаро 2019 йилда Ш.Ш. томонидан зўрланганини баён этган.
Маълумот учун, ходим Ш.Ш. 2020 йил февраль ойида ишга қабул қилинган. Жабрланувчи ҳуқуқни муҳофаза қилиш органларига биринчи марта 2022 йилда ариза билан мурожаат қилган.
Шундан сўнг, фуқаро М.Н.нинг аризаси Бош прокуратурада белгиланган тартибда кўриб чиқиш учун тақдим этилган. 4 апрель куни мазкур ҳолат юзасидан Тошкент вилояти прокуратураси томонидан Жиноят кодексининг 118-моддаси 4-қисми билан жиноят иши қўзғатилган.
“Ходим Ш.Ш.нинг келгусида Қўриқлаш бўлимида хизмат ўташи тўғрисидаги қарор тергов натижаларига кўра қабул қилинади”, — дейилади хабарда.
Хоразмда оилавий болалар уйи раҳбари уч нафар вояга етмаган тарбияланувчини 10 ой давомида вилоят адлия бошқармаси ва туман фавқулодда вазиятлар бўлими бошлиқлари билан жинсий алоқада бўлишга мажбурлагани ҳақида хабар берилганди. Аввалроқ ушбу ҳолат юзасидан муносабат билдирган Президент администрацияси шўба мудири Саида Мирзиёева қонунчиликда жиддий муаммолар борлиги ва ушбу бўшлиқдан жирканч шахслар фойдаланиб қолаётганини алоҳида қайд этиб, Бош прокуратурадан мазкур ҳолатга алоҳида эътибор қаратиб, синчиклаб ўрганишни ва ҳуқуқий баҳо беришни сўраганди.
Президент администрацияси раҳбари ўринбосари Комил Алламжонов педофилларга нисбатан кимёвий кастрация жазосини қўллаш юзасидан қонунчиликка ўзгартириш киритиш вақти келганини айтганди. Болалар омбудсмани ҳам меҳрибонлик уйи қизларига нисбатан қўлланадиган ҳар қандай жинсий жиноятларга оғир жазо турларини қўллаш керак, деган позицияда.
Изоҳ (1)
Тўғрикуя. Лекин ўтган сафар андижон шахар хокими дилмурод шундай видеоси чиқиб кетганида ўша инсон шаъни, қадр қиммати хақидаги қонунлар йўқмиди? Ёки бу қонун фақат вилоят хокими ёки ундан баланд тоифадаги мансабдорлар учун ишлайдими? Ундан пастроқ тоифадаги одамлар учун ишламайдими?