“Ливерпуль” Дортмунднинг “Боруссия” клуби футболчиси Жуд Беллингҳем учун курашдан чиқди. Бу ҳақда The Telegraph хабар берди.
Хабарга кўра, мерсисайдликлар Беллингҳемнинг нархи туфайли уни сотиб олиш фикридан қайтган. Қайд этилишича, трансфер футболчининг маошидан ташқари 115 миллион фунт стерлингдан кўпроққа тушади. Бу “Ливерпуль” ёзги бюджетининг асосий қисми ҳисобланади.
“Ливерпуль” унинг ўрнига ҳар бир чизиқни кучайтиришга эътибор қаратади. “Қизиллар” Беллингҳем ўрнига эътиборини “Челси” вакиллари Мэйсон Маунт ва Конор Галлаҳер, “Брайтон” аъзоси Мойсес Кайседо ҳамда “Бавария” футболчиси Райан Гравенберҳ каби ўйинчиларга қаратади.
Бош мураббий Юрген Клопп раҳбариятнинг қарорини қўллаб-қувватламоқда. Германиялик мутахассис таркибни кучайтириш борасидаги ишлар тезда ўз самарасини беришини истамоқда ва шу боис келиши мавҳум бўлган футболчи учун узундан узоқ курашга қўшилмоқчи эмас.
Беллингҳем учун эса Мадриднинг “Реал” клуби асосий даъвогарга айланди. Мадрид клуби эҳтимолий трансферга лимит қўйди. “Қаймоқранглилар” Дортмунд клубига бонуслар билан бирга 100 миллион евро тўлашга тайёр. Бу сумма 130—150 миллионгача бориши мумкин.
Англиялик иқтидор эгасига “Челси”, “ПСЖ” ва “Манчестер Сити” ҳам бефарқ эмас. Бироқ бу клублар Беллингҳем учун қизиқ эмас.
19 ёшли футболчининг дортмундликлар билан амалдаги шартномаси 2025 йилнинг ёзига қадар мўлжалланган.