Қурилиш ва уй-жой коммунал хўжалиги вазирлиги ижтимоий тармоқларда тарқалган Бухоро вилоятидаги қабристон яқинида ноқонуний қурилиш ишлари амалга оширилаётгани айтилган видеога муносабат билдирди.
Маълум қилинишича, вилоят Қурилиш соҳасида ҳудудий назорат инспекцияси томонидан Жондор тумани “Навгади” МФЙ ҳудудида “Evro Star Stroy” МЧЖ томонидан қурилиши бошланган объектда ўрганиш ишлари олиб борилган.
Маълумотларга кўра, белгиланган ҳудудда савдо ва маиший хизмат кўрсатиш мажмуаси, коттеж ва кўп қаватли турар-жой биноси қуриш учун 10 000 метр квадрат ер майдони ажратилган.
Мазкур объект қурилиши бош режада тасдиқланган қизил чизиқдан чиқмаган ҳолда “ЎзГАШКЛИTИ” ташкилотининг мутахассислари томонидан белгилаб берилган нуқталар бўйича олиб борилмоқда. Аммо ишчи-қурувчилар учун овқатланиш, дам олиш, ювиниш хоналари, штаб хонаси учун вақтинчалик енгил конструкциядан қурилган 120 метр квадрат майдондаги қурилмалар бош режада кўрсатилмагани боис ноқонуний деб топилган.
“Пудрат ташкилотига енгил конструкцияларни 15 кун муддатда бартараф этиш ва ер майдонини дастлабки ҳолатга келтириш юзасидан огоҳлантириш берилди”, — дейилади муносабатда.
Аввалроқ Тошкент шаҳар Шайхонтоҳур туманида қурилаётган кўп қаватли уйлардан бири қийшиқ қурилаётгани айтилган видео тарқалганди. Қурилиш ва уй-жой коммунал хўжалиги вазирлиги ҳолатга муносабат билдириб, мазкур объект замонавий архитектура намунаси сифатида ўзига хос дизайн асосида лойиҳалаштирилгани, бу бино конструктив элементларида камчиликлар борлигини англатмаслигини маълум қилди.
11 апрель куни эса Журналистика университетининг бинолари орасида ёриқ пайдо бўлгани тўғрисида хабар берилганди. Қурилиш ва уй-жой коммунал хўжалиги вазирлиги ҳолатга расмий муносабат билдириб, университет биносидаги ёриқлар юқори хавф даражасига эга эмаслигини маълум қилди.
Изоҳ (0)