Тошкент шаҳри Юнусобод туманидан оқиб ўтувчи Бўзсув канали бўйида ноқонуний объект қурилиши тўхтатилди. Бу ҳақда Табиат ресурслари вазирлиги ахборот хизмати хабар берди.
Ўрганишлар давомида “Тошкент ўрдаси” МЧЖ томонидан Бўзсув канали бўйи қирғоғида тўққиз қаватли меҳмонхона биноси қуриш учун пойтахт ҳокимининг 2014 йил 14 май кунги қарори қабул қилингани, бугунги кунда эса режалаштирилган ушбу бинонинг беш қавати қурилгани маълум бўлган.
Тошкент шаҳар ҳокимининг 2018 йил 13 июлдаги “Тошкент шаҳар ҳудудидан оқиб ўтувчи канал ва коллекторларнинг қирғоқ бўйи минтақаларини белгилаш ҳақида”ги 1043-сонли қарорига асосан Бўзсув каналининг қирғоқ бўйи кенглиги 15 метрни ташкил этиши белгиланган.
Бироқ ўрганиш жараёнида ушбу қурилиш биноси Бўзсув канали қирғоқ бўйидан 10 метр масофада жойлашгани, қурилиш ишларини амалга ошириш учун Тошкент шаҳар каналлардан фойдаланиш ва уларга туташ ҳудудларни ободонлаштириш бошқармасидан рухсатнома ҳамда давлат экологик экспертизасининг хулосаси олинмагани аниқланган.
Шу муносабат билан Тошкент шаҳар Экология бошқармаси томонидан қурилиш ташкилотига қурилиш ишларини тўхтатиш ва камчиликларни бартараф этиш бўйича огоҳлантириш берилган. Шунингдек, қонун бузилиши юзасидан тўпланган ҳужжатлар тегишли тартибда расмийлаштирилиб, ҳуқуқий баҳо бериш учун тегишли судга даъво аризаси киритиш чоралари кўрилмоқда.
Қурилиш ва уй-жой коммунал хўжалиги вазирлигига кўра, 023 йилда объект такроран жойига чиқиб ўрганилганда ҳам қурилиш-монтаж ишларини бошлаш учун белгиланган тартибда рўйхатдан ўтмасдан қурилиш ишлари олиб борилаётгани аниқланган. МЧЖ мансабдор шахси нисбатан ноқонуний қурилиш ишларини зудлик билан тўхтатиш бўйича огоҳлантирилган ва қурилиш ишларига масъулларга тушунтириш ишлари олиб борилган. Шундан сўнг объект қурилиши тўхтатилган.
Изоҳ (0)