Қашқадарёда икки нафар ҳоким ёрдамчисига нисбатан жиноят иши қўзғатилди

Қашқадарёнинг Яккабоғ ва Шаҳрисабз туманида икки нафар ҳоким ёрдамчисига жиноят иши қўзғатилди. Бу ҳақда ДХХ матбуот хизмати хабар қилди.

ДХХнинг Қашқадарё вилояти бўйича бошқармаси ходимлари томонидан иқтисодий жиноятларга қарши курашиш йўналишида олиб борилган тезкор-қидирув тадбирлари натижасида, Яккабоғ туманидаги маҳаллалардан бирида ҳоким ёрдамчиси лавозимида ишловчи шахс ўзи норасмий раҳбарлик қилувчи иккита МЧЖга қурилиш материаллари сотиб олиш бўйича банкдан ажратилган 1,7 миллиард сўмлик имтиёзли кредит маблағларини бошқалар билан жиноий тил бириктириб, ўзлаштириш йўли билан талон-торож қилгани аниқланган.

Ҳозирда мазкур ҳоким ёрдамчиси ва бошқаларга нисбатан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилган.

Яна бир ҳолатда эса Шаҳрисабз туманидаги маҳаллалардан бирида ҳоким ёрдамчиси лавозимида ишловчи шахс маҳаллий фуқаро фойдаланиб келаётган 5 гектар ер майдони аукцион савдоларига чиқиб кетганлигидан хабардор бўлиб, унга ушбу ер майдонининг 50 сотихини қолдириб бериш эвазига 500 АҚШ доллари олган вақтида ДХХ ва Бош прокуратура ҳузуридаги департамент ходимлари томонидан ушланди.

Ҳозирда мазкур ҳоким ёрдамчисига нисбатан Жиноят кодексининг 168-моддаси (фирибгарлик) ва 28, 211-моддалари (пора бериш) билан жиноят иши қўзғатилган.