Жиззахда пул эвазига тиббиёт коллежини тугатгани тўғрисида диплом олиб беришни ваъда қилган шахслар қўлга олинди, деб хабар беради Бош прокуратура ҳузуридаги департамент.
Қайд этилишича, департамент ҳамда ДХХнинг Жиззах вилояти бошқармалари томонидан тезкор тадбир ўтказилган. Тадбирда А.Я. исмли шахс фуқаролар Г.А. ва К.Ў.га танишлари орқали тиббиёт коллежини тугатгани тўғрисида диплом олиб бериш эвазига 2,4 минг долларни олган вақтида ушланган. Унинг кўрсатувига асосан давом этган тадбирда, Касбий таълимни ривожлантириш ва мувофиқлаштириш ҳудудий бошқармаси бош услубчиси Б.А. 2,4 минг долларни олган вақтида ашёвий далиллар билан қўлга олинган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Эслатиб ўтамиз, 2022 йил бошида Жиззах вилояти ИИБ жиноят қидирув бошқармаси уюшган жиноятчиликка қарши курашиш бўлими ходимлари томонидан сохта диплом ясаб сотувчилар қўлга олинганди. Шунингдек, ўша йилнинг сентябрида Сирдарёда институтни тугатганлик ҳақида сохта диплом олиб бермоқчи бўлганлар ушлангани, 2020 йилда эса Асакада сохта диплом ваъда қилган коллеж ҳисобчиси 1100 доллар пора билан қўлга тушгани тўғрисида хабар берилганди.
Изоҳ (0)