Qashqadaryoning Yakkabog‘ va Shahrisabz tumanida ikki nafar hokim yordamchisiga jinoyat ishi qo‘zg‘atildi. Bu haqda DXX matbuot xizmati xabar qildi.
DXXning Qashqadaryo viloyati bo‘yicha boshqarmasi xodimlari tomonidan iqtisodiy jinoyatlarga qarshi kurashish yo‘nalishida olib borilgan tezkor-qidiruv tadbirlari natijasida, Yakkabog‘ tumanidagi mahallalardan birida hokim yordamchisi lavozimida ishlovchi shaxs o‘zi norasmiy rahbarlik qiluvchi ikkita MCHJga qurilish materiallari sotib olish bo‘yicha bankdan ajratilgan 1,7 milliard so‘mlik imtiyozli kredit mablag‘larini boshqalar bilan jinoiy til biriktirib, o‘zlashtirish yo‘li bilan talon-toroj qilgani aniqlangan.
Hozirda mazkur hokim yordamchisi va boshqalarga nisbatan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilgan.
Yana bir holatda esa Shahrisabz tumanidagi mahallalardan birida hokim yordamchisi lavozimida ishlovchi shaxs mahalliy fuqaro foydalanib kelayotgan 5 gektar yer maydoni auksion savdolariga chiqib ketganligidan xabardor bo‘lib, unga ushbu yer maydonining 50 sotixini qoldirib berish evaziga 500 AQSH dollari olgan vaqtida DXX va Bosh prokuratura huzuridagi departament xodimlari tomonidan ushlandi.
Hozirda mazkur hokim yordamchisiga nisbatan Jinoyat kodeksining 168-moddasi (firibgarlik) va 28, 211-moddalari (pora berish) bilan jinoyat ishi qo‘zg‘atilgan.
Izoh (0)