“Қатарнинг Ўзбекистонда элчихона очиб, элчи юбориши ижобий ҳодиса” — сиёсатшунос Камолиддин Раббимов

Ўзбекистон мустақил бўлганидан бери, биринчи марта Қатар давлатининг фавқулода ва мухтор элчиси Тошкентга юборилди. Сиёсатшунос Камолиддин Раббимов бу ижобий ҳодиса экани тўғрисида фикр билдирди.

Президент Шавкат Мирзиёев 12 апрель куни бўлиб ўтган тантанали маросимда бир неча мамлакатлар фавқулодда ва мухтор элчиларидан ишонч ёрлиқларини қабул қилди. Хусусан, Қатар давлатидан Ҳасан Ҳамза Ҳошим президентга ишонч ёрлиғи топширди.

Сиёсатшунос Камолиддин Раббимов Telegram’даги каналида Қатарнинг Ўзбекистонда элчихона очиб, элчи юбориши ижобий ходиса эканини ёзди.

“Ўзбекистон мустақил бўлганидан бери, биринчи марта Қатар давлатининг фавқулода ва мухтор элчиси Тошкентга юборилди. Қатар энди Ўзбекистонда элчихона очди. Шу пайтга қадар, Ўзбекистон Қатар билан алоқаларини Москвадаги ушбу давлатнинг элчихонаси орқали юритиб келди.

Қатар, ўзи кичик бўлгани билан, геосиёсий нуқтаи назардан жуда муҳим давлат. Бу давлат, баъзан ўзининг гигант қўшнилари бўлмиш Саудия, Бирлашган Араб Амирликлари ва бевосита қўшниси бўлмаган Миср билан ҳам тираша олади. Қатарнинг геомафкураси жуда уникал. Бу давлатнинг раҳбарларида ислом цивилизациясининг истиқболи борасида маълум лойиҳалар бор. Мана шундай лойиҳалар эса, мисол учун, Саудияда кўринмайди. Саудияда бугунги кунда миллий, яъни, фақат шу давлатнинг ўз ҳудуди ва халқи билан боғлиқ лойиҳалар устувор. Қатарнинг Ўзбекистонда элчихона очиб, элчи юбориши ижобий ҳодиса” — деб ёзган сиёсатшунос.

Камолиддин Раббимов фикрича, Ўзбекистон глобал майдондаги субъективлигини ошириш учун янги лойиҳалар яратиши керак.

“Ўзбекистон ўзининг минтақадаги, Туркия ва мусулмон дунёсидаги, глобал майдондаги субъективлигини оширишда, фундаментал ўзликлар ва глобал қадриятларни синтез қилиш орқали янги лойиҳалар яратиши керак бўлади. Ҳозирча эса, бизда яна ўша эски қадрият “хавфсизлик ва барқарорлик” монополияга интилаётганини кўришимиз мумкин. Бу яқин ўтмишда, Ўзбекистон учун ижобий ютуқлар бермади. Энди эса, умуман бера олмайди”, — дея қайд этган эксперт.

Аввалроқ Ўзбекистонда Қатар элчихонаси очилиши хабар қилинганди.