Тошкент шаҳрида 12 апрель куни Соғлиқни сақлаш вазирлиги томонидан “Ўзбекистон соғлиқни сақлаш тизими трансформацияси” мавзусида халқаро форум ўтказилди. Халқаро анжуманда сўзга чиққан вазир тиббиёт тизимига сармояларни жалб қилиш, шерикликнинг янги шаклларини ривожлантириш ҳақида гапирди, деб хабар бермоқда “Дарё” мухбири.
Амрилло Иноятовнинг айтишича, тиббиётни ривожлантириш учун энг аввал таълим тизимига эътибор қаратишимиз зарур.
“Мамлакат тиббий таълимини ўзгартирмай, унга фундаментал ёндошмай туриб, биз тиббиётимизни ўзгартира олмаймиз. Шунингдек, тиббиёти ривожланган бошқа давлатлар билан ҳамкорлик қилмас эканмиз, янги босқичга кўтарилолмаймиз. Бизнинг бетакрор, катта ‘фишка’миз бор, бу — муҳтарам президентимизнинг шифокор оиласида туғилгани. Шу сабабли бугун Ўзбекистон тиббиётига жуда катта эътибор қаратиляпти”, — деди вазир.
ССВ раҳбари Ўзбекистондаги қулай инфратузилма, зарур шарт-шароитлар, инвесторларнинг ҳуқуқлари қонун билан мустаҳкамлангани ортидан чет эллик ҳамкорларнинг қизиқиши йилдан йилга ортиб бораётганини билдирди.
“Президент фармонлари натижасида сўнгги 6 йилда хусусий клиникалар сони 2,5 баравар кўпайиб, 8 мингтага етди. Бу ҳам, албатта, кам. Бугунги кунда хорижий инвестициялар иштирокидаги 159 та шифохона фаолият олиб бормоқда. Бу рақамни яқин икки йилда 10 бараварга оширишни режа қилганмиз”, — дея қайд этди Амрилло Иноятов.
Вазирнинг таъкидлашича, хусусий тиббиёт учун чекловлар олиб ташланиши натижасида улар шуғулланадиган йўналишлар сони 50 тадан 130 тага ошган.
“Хусусан, ҳозир нодавлат тиббиётнинг соҳадаги умумий улуши 30 фоиздан ортган. Бу кўрсаткични 2025 йилга бориб, камида 60 фоизга етказиш мақсад қилинган. Бундан ташқари, қисқа вақтда 33 та хусусий шифохона томонидан давлат буюртмаси асосида 11 миллиард сўмлик тиббий хизматлар кўрсатилган. Бу рақамларни 10 баробарга оширишни режа қилганмиз”, — деди у.
Изоҳ (0)