Россия президенти матбуот котиби Дмитрий Песков россиялик ҳарбийлар томонидан содир этилгани айтилаётган украиналик асирнинг боши кесилишига муносабат билдирди. Бу ҳақда “Коммерсантъ” хабар берди.
Песковнинг сўзларига кўра, ҳарбий хизматчининг (эҳтимол украиналик) боши кесилгани тасвирлари, агар уларнинг ҳақиқийлигини тасдиқлаш мумкин бўлса, текшириш учун сабаб бўлиши мумкин.
“Дастлаб ушбу даҳшатли кадрларнинг ҳақиқийлигини текшириш керак, албатта, бу даҳшатли кадрлар. Бу, албатта, бу ростан ҳам содир бўлганми ёки йўқми текшириш учун сабабдир. Агар шундай бўлган бўлса, унда қаерда ва ким томониданлигини аниқлаш керак”, — деди Песков.
Украиналик асирнинг боши кесилиши видеоси
11 апрель куни кечки пайт Telegram каналларда украиналик ҳарбийнинг боши кесилаётгани акс этган видеолар тарқалди. Дастлабки видеолардан бири Россияда экстремистик деб тан олинган ёпиқ Telegram каналида пайдо бўлган. Сўнг видео Россиянинг Украинага босқинини қўллаб-қувватловчи Telegram каналлар ва Украина ижтимоий тармоқларида ҳам тарқалди.
Видеода номаълум ҳарбий қўлига украиналик аскарларга хос сариқ тасма боғланган эркакнинг бошини тириклайин кесиб олади. Қотилнинг кийимида унинг қайси томонга тегишли эканини билдирувчи бирор белги кўринмаган. Кадр ортида бир киши: “Уни қопга солиб, командирга юборинглар”, дейди.
Украина ташқи ишлар вазири Дмитрий Кулеба видеога муносабат билдирар экан, “Россия ИШИДдан ҳам баттар” эканини таъкидлади. Украина раҳбари Владимир Зеленский эса дунё раҳбарларига видео бўйича муносабат беришга чақирди.
“Ҳамма нарса учун ҳуқуқий жавобгарлик бўлади. Террорни енгиш керак. Агар раҳбарлар муносабат билдирмаса, одамлар тушуниб етмайди. Ҳозир ҳаракатни бошлаш керак! Биз Украинадагилар эса фронтга максимал даражада тўпланишимиз керак. Максимал ёрдам керак”, — деган у.
Изоҳ (0)