Япония “Толибон”дан аёлларнинг Бирлашган Миллатлар Ташкилотида ишлашига қўйилган тақиқни бекор қилишни сўради. Бу ҳақда “Дарё”нинг Афғонистондаги мухбири хабар берди.
Япониянинг Кобулдаги элчиси Такаши Окада “Толибон” ташқи ишлар вазири Амирхон Мутаққий билан учрашувда аёлларнинг БМТ идораларида ишлашини тақиқловчи фармондан чуқур хавотирда эканини айтди. Дипломат мазкур буйруқни бекор қилишни талаб қилди.
Суҳбат давомида томонлар Афғонистондаги вазият ва ташқи алоқалар ҳақида мулоқот қилган. Такаши Окада ташрифи чоғида Афғонистонда қизларнинг таълимини қайта тиклашга ҳам чақирган.
“Толибон” Ташқи ишлар вазирлиги ва унинг раҳбари Япония элчиси билан икки томонлама муносабатлар ва сиёсий вазиятни муҳокама қилганини билдирди. Афғонистон ТИВ матбуот котиби Абдулқаҳҳор Балхий Twitterъда БМТда аёлларнинг ишлаши тақиқланганига ишора қилмаган ҳолда Япония элчиси фикрига қарамай, мамлакат “Толибон” ҳукумат билан ҳамкорлик қилиш тарафдори эканини билдирди.
Балхий, Мутаққий Афғонистондаги вазиятни ижобий деб баҳолади ва дунё ижобий ўзгаришларни ҳисобга олган ҳолда реалистик бўлиши кераклигини айтди.
Изоҳ (0)