Россия ва Украина ижтимоий тармоқларида россиялик экани айтилаётган ҳарбийлар украиналик аскарни шафқатсизларча ўлдиргани тасвирланган видео тарқалди.
Украина хавфсизлик хизмати маълум қилишича, видеода украиналик ҳарбий Россия армияси жангчилари томонидан қийноққа солингани ва ўлдирилгани тасвирланган. УХХ қасддан одам ўлдириш билан уруш қонунлари ва анъаналарини бузиш (Украина Жиноят кодексининг 438-моддаси 2-қисми) моддаси бўйича терговга қадар текширув бошлади.
“Биз бу ваҳшийларни топамиз. Керак бўлса, ернинг тагидан ҳам тортиб оламиз. Улар қилган иши учун албатта жазоланади”, — дея изоҳ берди УХХ раҳбари Васил Малюк.
Украина ташқи ишлар вазири Дмитрий Кулеба видеога муносабат билдирар экан, “Россия ИШИДдан ҳам баттар” деди.
“ИШИДдан ҳам баттар Россиянинг Бирлашган Миллатлар Ташкилоти Хавфсизлик кенгашига раислик қилаётгани бемаънилик. Россиялик террорчилар Украина ва БМТдан чиқариб юборилиши ҳамда жиноятлари учун жавобгарликка тортилиши керак”, — деб ёзди у Twitter’даги саҳифасида.
Украина президенти Владимир Зеленский дунё етакчиларини ушбу видеога жавоб қайтаришга ва Киевга Москвага қарши туришда ёрдам беришга чақирди: “Ҳамма муносабат билдириши керак. Ҳар бир раҳбар. Вақт ўтишини, (бу воқеа) унутилишини кутманг. Биз ҳеч нарсани унутмаймиз. Ва қотилларни кечирмаймиз. Ҳамма нарса учун ҳуқуқий жавобгарлик бўлади. Террорни енгиш керак. Агар раҳбарлар муносабат билдирмаса, одамлар тушуниб етмайди. Ҳозир ҳаракатни бошлаш керак! Биз Украинадагилар эса фронтга максимал даражада тўпланишимиз керак. Максимал ёрдам керак”.
Россия расмийлари ҳам Мудофаа вазирлиги ҳам видеога изоҳ бермади. “Агентство” хабарига кўра, айрим россияпараст Telegram каналларида видеони маъқулловчи реакциялар билдирилган.
Бу Украинадаги урушда боши кесилган ҳарбий хизматчиларнинг биринчи видеоси эмас
CNN телеканали 8 апрель куни россияпараст каналларда тарқалган ва унда аскарларнинг боши кесилган яна бир видеога эътибор қаратди. Пост муаллифларининг таъкидлашича, видео Донецк вилоятидаги Бахмут шаҳри яқинида “Вагнер” ёлланма аскарлари томонидан тасвирга олинган.
Кадрларда мажақланган ҳарбий машина ёнида украиналик ҳарбий хизматчилар экани айтилаётган икки нафар бошсиз жасад ётганини кўриш мумкин. Кадр ортидаги одамлар рус тилида ҳарбий машина минага бориб урилгани ҳақида гаплашган. CNN қайд этишича, видеодаги жасадларнинг қўллари ҳам кесилган. Ҳарбийларнинг танасини ким нимталагани номаълум.
10 апрель куни Украинанинг “УНИАН” нашри, шунингдек, металл симга ўрнатилган одам боши суратлари тарқалганини хабар берди. Бир кун аввал суратни уруш тарафдори бўлган Россиянинг “Military Z” жамоатчилиги эълон қилган, унда сурат Бахмутда олингани ва ундаги бош Украина Қуролли кучлари аскарига тегишли экани айтилган. Фотосуратнинг ҳақиқийлиги мустақил манбалар томонидан тасдиқланмаган.
Изоҳ (0)