Бирлашган Миллатлар Ташкилотининг Афғонистондаги Гуманитар масалаларни мувофиқлаштириш бошқармаси ушбу давлатга инсонпарварлик ёрдами учун ажратилаётган маблағ тугаб бораётгани ҳақида огоҳлантирди, деб хабар бермоқда “Дарё”нинг Афғонистондаги мухбири.
12 апрель, чоршанба куни OCHA (БМТнинг Гуманитар масалаларни мувофиқлаштириш бошқармаси) Twitter’даги саҳифасида Афғонистонга инсонпарварлик ёрдамини молиялаштириш тўхтатилиши мамлакатдаги миллионлаб одамлар ҳаётига таҳдид солаётганини айтди.
Нашр этилган маълумотларга кўра, ресурслар етишмаслиги сабаб Жаҳон озиқ-овқат ташкилоти Афғонистондаги муҳтожларга ёрдамни икки баравар қисқартириши кутилмоқда.
OCHA Афғонистондаги инсонпарварлик эҳтиёжлари учун етарли маблағ тўпланмаса, миллионлаб афғонлар очарчилик, касаллик ва ўлимга дучор бўлишидан огоҳлантирди.
Эслатиб ўтамиз, афғонистонликларнинг баъзилари ўз фарзандларига седатив (тинчлантирувчи) дорилар бериб, улардаги очлик ҳиссини сусайтиришга мажбур бўлаётган бўлса, бошқалари кун кечириш учун болаларини ёки ўз органларини сотаётгани ҳақида хабар берилганди.
Изоҳ (0)