Жорий йилнинг март ойида Ўзбекистонда келгуси 12 ой учун аҳолининг инфляцион кутилмалари 14,4 фоиз, бизнес вакиллариники эса 14,1 фоиз бўлмоқда. Бу ҳақда Марказий банк инфографика тақдим этди.
Инфляцион кутилмалар — турли гуруҳлар бўйича мос жавобни белгилаган аҳоли сонининг ўша жавоблар ўртача қийматига кўпайтмалари йиғиндисини жами аҳоли сонига нисбати (ўртача кўрсаткич).
Март ойида аҳоли ва тадбиркорларнинг инфляцион кутилмалари январга нисбатан пасайгани кузатилди. Йил бошида аҳолининг инфляцион кутилмалари 18,9 фоизга, тадбиркорларнинг кутилмалари эса 18,7 фоизга етган. Бу даврда инфляция 12,2 фоиз бўлган.
Бизнесменлар ва аҳолининг ярми нархлар ошишига валюта курсининг ўзгариши асосий омил бўлишини таъкидлаган (мос равишда 51 ва 50 фоиз).
Уларнинг учдан бири иш ҳақи ва нафақаларнинг ошиши келгуси бир йилда нархлар ошишига таъсир кўрсатишини кутмоқда (мос равишда 38 ва 34 фоиз.
Сўровнома қатнашчиларининг катта қисми нархлар ошиши 12 ой ичида 9-12 фоиз атрофида бўлишини кутмоқда. Март ойида нархлар 17-20 фоизга юқорилашини кутаётган одамлар сони январь—февралга нисбтан ошган бўлса, 31-50 фоизга ўсишини кутаётган одамлар сони аввалги ойларга нисбатан камайган.
Ҳудудлар кесимида энг кўп нархлар Бухоро ва Наманган вилоятларида ошиши кутилмоқда — 15,8 фоиз.
Кейинги ўринларда эса Тошкент шаҳри (15,4 фоиз), Андижон ва Самарқанд (14,8 фоиз) вилоятларида нархлар ўсиши нисбатан баланд фоизларда кутилмоқда.
Аввалроқ доллар тақчиллиги туфайли жаҳон бозорлари инқирозга юз тутаётгани ҳақида хабар берилганди.
Изоҳ (0)