Европа инвестиция банки (ЕИБ) Ўзбекистоннинг минтақадаги энг катта умумий қувватга эга фотоэлектр станцияларини ривожлантириш дастури учун 83,6 миллион доллар кредит ажратишни маъқуллади. Бу ҳақда “Дарё”га банк матбуот хизмати хабар берди.
Осиё тараққиёт банки, Осиё инфратузилма инвестициялари банки ва Европа тикланиш ва тараққиёт банки билан биргаликда ЕИБ умумий ишлаб чиқариш қуввати 897 МВт бўлган учта қуёш фотоэлектр станциясини қуриш ва эксплуатация қилишни молиялаштириш учун жами бўлиб 396,4 миллион доллари ажратади.
Бу Ўзбекистондаги электр энергияси таъминотини оширади ва қазиб олинадиган ёқилғи ишлаб чиқаришга бўлган эҳтиёжни камайтиради.
Европа инвестиция банки (ЕИБ) вице-президенти Тереза Червинскага кўра, бу Ўзбекистоннинг 2030 йилга келиб электр энергияси ишлаб чиқаришда 25 фоиз қайта тикланадиган манбалардан фойдаланиш мақсадига эришишга ёрдам беради.
Кредитнинг барчаси Masdar (Abu Dabi Future Energy Company ОmAJ) компанияси томонидан амалга оширилувчи учта алоҳида лойиҳани молиялаштириш учун мўлжалланган.
У қуйидаги учта қуёш фотоэлектр станциясини қуриш ва фойдаланишни молиялаштиради: Самарқанд ва Жиззахдаги ҳар бири 220 МВт қувватга эга иккита станция ва Шерободдаги 457 МВт қувватга эга битта станция.
Маблағлар, шунингдек, станцияларни Ўзбекистон электр тармоқлари операторига тегишли бўлган ва у томонидан бошқариладиган электр тармоғига улаш учун ҳам йўналтирилади. Бу мамлакатнинг 2030 йилга келиб 7 ГВт қуёш ва 5 ГВт шамол асосида энергия ишлаб чиқариш бўйича режасини илгари суради.
Лойиҳа амалга оширилганидан кейин у йиллик иссиқхона газлари чиқиндилари чиқаришни бир миллион тоннадан ортиқ CO2 эквивалентига камайтиришга ёрдам беради.
Қурилиш ишлари дарҳол бошланади ва янги фотоэлектр станциялари 2024 йилда ишга тушади.
Европа инвестиция банки ҳақида
ЕИБ Европа Иттифоқининг унга аъзо давлатларга қарашли бўлган узоқ муддатли кредитлар берувчи ташкилотдир. У ЕИ сиёсати мақсадларига эришишга ёрдам бериш учун ишончли инвестицияларни узоқ муддатли молиялаштириш билан таъминлайди.
Аввалроқ Ўзбекистон энергетика соҳасида миллиардлаб инвестицияларни жалб қилаётгани ҳақида хабар берилганди.