Япония 2022 йилнинг февралидан кейин Россия кўмирига бўлган қарамликни камайтирди. Мамлакатнинг энергетика компаниялари Индонезия ва Жанубий Африкада муқобил етказиб берувчиларни қидирмоқда. Бу ҳақда Nikkei хабар берди.
Япония Молия вазирлиги маълумотларига кўра, жорий йилнинг февраль ойида Япония Россиядан 230 минг тонна кўмир импорт қилган. Бу 2022 йил февралига нисбатан 73 фоизга кам.
2022 йилнинг апрелидан 2023 йилнинг февралигача импорт қарийб 6,5 миллион тоннани ташкил этган. Бу ўтган йилнинг шу даврига нисбатан 45 фоизга кам.
Маълумотларга кўра, Россия кўмирининг умумий импортдаги улуши бир йил олдинги 9 фоизга нисбатан 2 фоизни ташкил этди.
Шу билан бирга, Япониянинг Индонезиядан кўмир импорти худди шу даврда 28 фоизга ошди. Канададан импорт икки баравар, Жанубий Африкадан эса олти баравар ошди.
2021 йил охирида Россия Японияга кўмир етказиб бериш бўйича Австралиядан кейинги иккинчи ўринда эди. Ҳозир Индонезия етказиб бериш ҳажми бўйича Россиядан олдинда.
Япония ҳукумати Россиянинг Украинадаги уруши бошланганидан икки ой ўтиб, 2022 йил апрелида Россия кўмирига қарамликни камайтиришга қарор қилган.
2022 йилнинг ёзида Япониянинг энг йирик энергетика гуруҳи Жера Россиядан кўмир сотиб олишни бутунлай тўхтатган.
Изоҳ (0)