Илон Маск ўтган ҳафтада 14,5 миллиард доллар йўқотди

Tesla бош директори Илон Маскнинг бойлиги ўтган ҳафтада 14,5 миллиард долларга камайди. Бу сайёрадаги энг бой одамлар орасида ҳафталик энг сезиларли пасайишдир. Бу ҳақда Forbes хабар берди.

Бугунги кунга келиб Маскнинг бойлиги 187,9 миллиард долларга баҳоланмоқда. У ҳамон АҚШнинг энг бой миллиардери ва дунёдаги иккинчи энг бой одам ҳисобланади.

Маскнинг бойлиги бир ҳафта ичида 10,8 фоизга пасайган Tesla акциялари ортидан тушиб кетди.

Инвесторларга автомобиль ишлаб чиқарувчининг сўнгги чораклик ҳисоботи ёқмади. Унга кўра, компания омборларидаги автомобиллар сони жорий йил бошида энг юқори чўққига чиққан. Аввал Tesla автомобилларига талаб бунчалик паст даражага тушмаган.

Ҳисоб-китобларга кўра, бу ҳафта энг катта пул йўқотган миллиардерлар орасида LVMH раҳбари Бернард Арно иккинчи бўлди.

Forbes глобал рейтингида биринчи ўринни эгаллаган француз миллиардерининг бойлиги 2,7 миллиард долларга камайди ва ҳозирда 223,1 миллиард долларни ташкил этади.

Аввалроқ Бернард Арно дунёдаги энг бой одамлари рейтингидаги етакчиликни Илон Маскдан тортиб олгани ҳақида хабар берилганди.