Ўзбекистоннинг 2017—2022 йиллардаги банан импорти таҳлил қилинди. Бу ҳақда макроиқтисодий ва ҳудудий тадқиқотлар институти хабар берди.
2022 йилда Ўзбекистонга банан импорти ҳажми аввалги йилдагига қараганда 1,5 баравардан кўпроққа ошган.
Маълумотларга кўра, 2022 йилда Ўзбекистонга банан импорти ҳажми 140,2 минг тоннани ташкил қилган. Бу эса аввалги йилдагига қараганда 1,6 баробар кўп. Таққослайдиган бўлсак, 2021 йилда мамлакат 2020 йилдагига нисбатан 2,2 баробар кўп банан импорт қилган.
2020 йилда Ўзбекистонга банан импорти ҳажми 2019 йилдаггига нисбатан 7 фоизга камайган. Ўша йили COVID-19 пандемияси бошланишидан олдин Ўзбекистонда банан истеъмоли тез ва сезиларли даражада ўсаётган эди. Аммо, ўсиш тенденцияси коронавирус таъсири туфайли тўхтаб қолди.
Кейинги йилларда импортнинг ўсиши тикланди. Банан истеъмолининг ўсишига ҳукуматнинг ушбу маҳсулотга импорт божхона тўловларини нолга тушириш ҳақидаги қарори туртки бўлди.
2021 йилнинг октябр ойидан Ўзбекистонда банан импорти учун нолга тенг божхона ставкаси тартиби амал қилмоқда ва бу муддат бир неча бор узайтирилди. Айни чоғда нолга тенг ставка 2024 йилнинг 1 январигача амал қилади.
Таъкидланишича, банан импорт қилувчи кўпгина мамлакатларда ушбу маҳсулот учун импорт тариф божи мавжуд. Масалан, Евросиё иқтисодий иттифоқига аъзо мамлакатларда банан учун импорт ставкаси 4 фоизни ташкил этади (лекин 1 кг учун камида 0,015 евро), Японияда мавсумий ставка қишда 18 фоиз ва ёзда 8 фоиз, Жанубий Кореяда — 30 фоиз.
Ҳукумат томонидан кўрилаётган бу чора-тадбирлар, шунингдек, аҳоли саломатлиги учун билвосита ва яна бир қанча фойдали жиҳатларга эга. Гарвард университети жамоатчилик соғлигини сақлаш мактаби тадқиқотига кўра, банан саломатлик учун жуда кўп фойдали хусусиятларга эга, жумладан:
- диабет хасталигини назорат қилишни яхшилайди;
- овқат ҳазм қилишни бир маромда сақлайди;
- ортиқча вазндан халос бўлишда ёрдам беради;
- қон босимини барқарорлаштиришади;
- яраларнинг битишида ёрдам беради.
Аввалроқ Европа Иттифоқи мамлакатлари январь ойида Эквадор бананларини етказиб беришнинг асосий бозорига айлангани ҳақида хабар берилганди.
Изоҳ (0)