Чехия ўзининг стратегик ҳужжатларида биринчи марта Россия ва Хитойни миллий хавфсизликка таҳдид деб эълон қилади. Шу пайтгача ҳужжатларда бундай мамлакатлар номи очиқ кўрсатилмаган.
Айни пайтда Чехия Мудофаа ва Ички ишлар вазирликлари ходимлари ҳужжат устида ишламоқда.
Чехия Мудофаа вазирлиги вакилининг сўзларига кўра, янгиланган стратегияларда терроризмдан ташқари энг катта таҳдид манбалари бўлган давлатлар аниқ қилиб кўрсатилади, булар Россия ва Хитойдир. У, шунингдек, мудофаа учун муҳим бўлган бошқа ҳужжатлар, масалан, “Узоқ муддатли мудофаа истиқболлари” ва “Қуролли кучларни ташкил этиш концепцияси” янгиланишини маълум қилди.
Мудофаа вазирлиги вакили ушбу ҳужжатлар эскиргани ва ўз аҳамиятини йўқотган ноаниқ иборалар билан тўла эканини тан олди.
Чехияда 2015 йилда “Хавфсизлик стратегияси”, 2017 йилда “Мудофаа стратегияси” қабул қилинганди, унда хавфсизликка таҳдид солиши мумкин бўлган муайян давлатлар номи кўрсатилмаган, фақат Шарқий Европада ўз амбицияларини куч билан амалга оширишга интилаётган “айрим кучлар” қайд этилган. Шу билан бирга иккала стратегия ҳам Қримнинг аннексия қилиниши билан якунланган Россиянинг Украинага биринчи ҳужумидан кейин қабул қилинган.
Янги ҳужжатларда очиқчасига Россия ва Хитой Чехия ва НАТО хавфсизлигига таҳдид соладиган асосий таҳдидлар сифатида кўрсатилади.
Октябрь ойида Пентагон томонидан тайёрланган АҚШнинг янги мудофаа стратегияси Россияни “ўткир таҳдид” деб атаган эди. Ҳужжатда, шунингдек, Хитой “Қўшма Штатларга барча жабҳаларда, ҳарбий, иқтисодий, технологик ва дипломатик жиҳатдан тизимли равишда қаршилик кўрсатиш нияти ва қобилияти ортиб бораётган ягона рақобатчи” эканлиги маълум қилинган.
Изоҳ (0)