Ироқ ҳукумати Сулаймония шаҳридаги фуқаролик аэропортининг ўққа тутилиши муносабати билан Туркиядан узр сўрашни талаб қилди. Бу ҳақда мамлакат президенти девонига таяниб, “РИА Новости” хабар берди.
Сулаймония фуқаро авиацияси маълумотларига кўра, 7 апрель куни халқаро аэропорт яқинида портлаш содир бўлган, натижада ёнғин келиб чиққан ва у ўчирилган. Ҳодиса оқибатида қурбонлар ва жароҳатланганлар қайд этилмаган. Аl-Hadas телеканали манбасига кўра, портлашга Туркия Қуролли кучларининг дрони томонидан берилган зарба сабаб бўлган.
Портлаш вақтида курдларнинг “Демократик Сурия кучлари” қўмондони Мазлум Абди аэропорт ҳудудида бўлган бўлиши мумкин. Ироқ президенти ҳужум Сулаймония аэропорти яқинида содир бўлганини айтиб, буни ўз суверенитетига қарши “даҳшатли тажовуз” деб атади.
“Туркиянинг Ироқ Курдистонидаги ҳарбий амалиётлари такрорланмоқда, охиргиси Сулаймония фуқаролик аэропортини бомбардимон қилишдир. Биз Ироқ ва унинг суверенитетига қилинган бу даҳшатли ҳужумларни кескин қоралаймиз, Туркия Ироқ заминида қарама-қарши кучлар борлиги баҳонасида тинч аҳолини террор қилишда давом этиши учун ҳеч қандай қонуний асос йўқ”, — дейилади Ироқ президенти идораси баёнотида.
Ироқ раҳбарияти Туркия ҳукуматини “масъулиятни ўз зиммасига олишга, бу ҳаракатлар учун расман узр сўрашга, ҳужумларни тўхтатишга ва тегишли томонлар билан мулоқот каналларини очиш орқали ички муаммоларни ҳал қилишга” чақирди.
Шунингдек, ҳужум такрорланган тақдирда Ироқ уларни олдини олиш учун қатъий позицияни эгаллашини билдирди. Ироқ парламенти биринчи вице-спикери Моҳсен ал-Мандалави 8 апрель куни Сулаймония аэропортига ҳужум бўйича тергов қўмитасини тузишни буюрди. У бунинг асосида “суверенитетни сақлаб қолиш ва халқ ҳаётини ҳар қандай ҳужумдан ҳимоя қилиш учун” чора кўрилишини айтди.
Туркия Ташқи ишлар вазирлиги мамлакат расмийлари Сулаймониядаги Курдистон ишчилар партиясининг фаоллиги кучайгани сабабли Ироқнинг Сулаймония шаҳридан учаётган ёки ундан келаётган самолётлар учун ҳаво ҳудудини ёпганини маълум қилди.
Тurkish Airlines авиакомпанияси ҳозирда Сулаймонияга рейслар йўқлигини тасдиқлаган. Шу билан бирга, у Сулаймония аэропорти ўққа тутилганидан кейин компания веб-сайти Ироқдан хакерлик ҳужумига учрагани ҳақидаги хабарларини рад этган.
Изоҳ (0)