Эрон Ислом инқилоби посбонлари корпуси (ИИПК) 450 километргача бўлган масофадаги нишонларга зарба беришга қодир бўлган камикадзе дронини ишлаб чиқди. Бу ҳақда корпус расмий вакили маълум қилди, деб ёзмоқда Tasnim News.
ИИПК Қуруқлик кучларининг тадқиқот ва ўзини ўзи таъминлаш бўйича жиҳод ташкилоти раиси генерал Али Куҳистонийнинг айтишича, Меъраж-532 деб номланган янги учувчисиз учар аппарат барча синовлардан муваффақиятли ўтган.
Унинг сўзларига кўра, дрон поршенли двигатель билан жиҳозланган ва бир учишда 450 километр масофани босиб ўта олади. Дронни транспорт воситасидан учирса бўлади, у ҳавода уч соатгача қолиши мумкин.
Шунингдек, эронлик генералнинг айтишича, дрон 50 килограмм оғирликдаги жанговар каллак билан нишонларни юқори аниқликда ура олади. Унинг қўшимча қилишича Меъраж-532 осон ва тез йиғилиб, парвозга тайёр бўлиши мумкин.
Аввалроқ The Guardian нашри Эрон яширинча Россияга узоқ масофага учувчи жанговар дронларни етказиб бергани ҳақида ёзганди. Нашрнинг аниқлик киритишича, Россия янада илғорроқ учувчисиз учоқларни олишдан манфаатдор, чунки Украина Қуролли кучлари Россия қўллаётган Shahed-131 ва Shahed-136 камикадзе дронларини самарали тарзда уриб туширишни ўрганган.
Россия урушда Эрон дронларидан фойдаланмоқда
Россия ҳарбийлари Украинадаги ҳарбий ва энергетика объектларига зарба бериш учун Эронда ишлаб чиқарилган Shahed-131/136 камикадзе дронларидан фаол фойдаланмоқда. Уларнинг номи “Геран-1” ва “Геран-2” га ўзгартирилган.
2022 йилнинг кузида The Washington Post газетаси Россия ўз ҳудудида Эрон дронларини ишлаб чиқаришни йўлга қўйишни режалаштираётгани ҳақида хабар берганди. 2023 йил январь ойи бошида Украина Миллий хавфсизлик ва мудофаа кенгаши котиби Алексий Данилов Толятти шаҳрида дронларни ишлаб чиқариш ташкил этилиши мумкинлигини маълум қилди. Февраль ойида The Wall Street Journal Россия ва Эрон расмийлари Татаристоннинг Елабуга шаҳрида дрон ишлаб чиқарувчи завод қуришни кўриб чиқаётгани ҳақида ёзди.
Изоҳ (0)