Тошкент вилояти ҳокими Зоир Мирзаев фуқаролар учун навбатдаги қабулида 18 ёшли набирасига компьютер сўраб келган отахон мурожаатини тинглаб, “Халқ банки”нинг вилоят филиали раҳбарига рамазонда савоб учун IT мутахассисига ёрдам беришини тайинлади. Бу ҳақда ҳоким қабулида иштирок этган “Дарё” мухбири хабар берди.
Маълум бўлишича, Тошкент вилояти ҳокимининг фуқаролар учун навбатдаги қабули Ўрта Чирчиқ туманида бўлиб ўтган.
Қабулда ҳокимга мурожаат қилиб келган отахон набираси компьютер мутахассислиги бўйича ўқишни тамомлаганини айтиб, унга компьютер зарурлигини, нафақаси катта набирасининг ўқишидан ортмаётганини айтиб, вилоят ҳокимидан кўмак сўради.
“Қабулда фуқароларга, ёрдам сўраб келувчиларга бирор нима атаб келганмисан? Отахоннинг 18 ёшли қиз набираси бор экан. IT’дан сертификати ҳам бор экан. Битта яхши ноутбук олиб беринг, рамазон ойида савоб бўлсин”, — деди “Халқ банки”нинг вилоят филиали раҳбарига топшириқ берган ҳоким.
Эслатиб ўтамиз, аввалроқ Зоир Мирзаев қабулига ёрдам сўраб келган 70 ёшдан ошган отахоннинг дардини тинглаб, болалари қаровсиз қолдирган отахонни саховат уйига жойлаштиришда кўмак беришини айтиб, “Бу ҳаммамиз учун иснод, рамазонда бунақа ҳолатларга дуч келиш уят”, деганди.
Изоҳ (0)