Telegram’даги каналларда Қашқадарё вилоятининг Чироқчи туманидаги қишлоқларнинг бирига айиқ оралагани кўринган видеолар тарқалди. Унда оломон таъқибидан қочаётган айиқ дастлаб хонадонларнинг бирига боргани, сўнгра ҳудуддаги мактаб биноси ичкарисига киришга урингани маълум бўлди. “Дарё” мухбири айиқ оралаган қишлоққа бориб, ёввойи ҳайвон билан боқлиқ воқеалар тафсилотини ўрганди.
Маҳаллий аҳоли вакилларининг айтишича, айиқ Чироқчи туманининг Самарқанд вилояти билан чегара ҳудудидаги тоғдан келиб қолган бўлиши мумкин.
“Уйим яқинида қўй боқиб ўтиргандим. Бир маҳал одамларнинг бақир-чақир овози эшитилди. Одамлар менга ‘қочинг айиқ келди’, дейишди. Мен ҳам айиқни кўриб қоча бошладим. Одамлар машинада қувишди. Ҳатто машина билан уриб юборишди. Шундан сўнг у каналдан ўтиб одамларнинг ҳовлилари орқали жарлик томон қочиб кетди”, — дейди воқеага гувоҳ бўлган Гулноза Олтибоева.
Гулноза Олтибоева “Дарё” мухбирига воқеа ҳақида гапириб бермоқда.Фото: “Дарё”
Молхонамга кирса-да, қўйимга ва молимга ҳам тегмади
Шу ҳудудда яшовчи яна бир фуқаро Гулжаҳон Сафарованинг айтишича, айиқ беозор ва жуда қўрқувдалиги кўриниб турган бўлган.
“Ҳовлида икки киши билан гаплашиб ўтиргандим. Айиқ, айиқ деган овоз эшитилди. Шундан сўнг менинг ёнимга келган машинали йигитлар айиқ қаёққа кетди деб сўради. Ҳовли четида боғланиб турган отим безовталанаётган экан. Ипини узмасин деб ёнига борсам, бир гуруҳ одамлар айиқни қувлаётганини кўрдим. Айиқ эса мен томон кела бошлади. Ёнимдан ўтиб молхонамизга кириб кетди. Одамлар эса қўлига илинган нарса билан қувлаб келди. У ерда биттагина қўй бор эди. Айиқ ўша ердан чиқиб сигир ва бузоқлар турган жойга ўтди. Ва бироз турди. Мен эса одамларга тегманглар, бу ҳам бир жонзод, сизларга зиён бермайди деб қайта-қайта бақирдим. Айиққа жуда раҳмим келди. Одамлар кўпайгач, айиқ қўрқиб яна қочиб кетди. Лекин на сигир, на қўйимга ташланди. Уларнинг ёнида жимгина турганди”, — дейди хонадон эгаси Гулжаҳон Сафарова.
Гулжаҳон Сафарова.Фото: “Дарё”
Қизимни қувиб кетди
Одамлардан қўрқиб қочган айиқ канал ёқасида яшовчи Ҳалима Ортиқованинг қизига ҳамла қилган.
Ҳалима Ортиқова.Фото: “Дарё”
“Шовқинни эшитиб аввалига жанжал деб ўйладим. Қочинг дейишгандан сўнг нималигини тасаввуримга сиғдиролмай ҳайрон бўлдим. Не кўз билан кўрсам ҳақиқий айиқ юрибди. Уйимиз ёнидаги каналдан ўтиб, канал ёқасида турган қизимни қувлаб кетди. Ҳаммамиз жон ҳолатда қочдик. Қизим иккаламиз аранг қутулиб қолдик. Айиқ эса сойликка қараб чопиб кетди”, — дейди Ҳалима Ортиқова.
Малоҳат Исмоилова.Фото: “Дарё”
“Уй ишларини қилиб юргандим. Одамларнинг овозидан сўнг кўчага чиқдим. Мактабимиздаги ўқитувчилардан бири нималигини айтмасдан олдига чиқманглар ташланиб кетади деди. Мен қутурган ит ёки бўри деб ўйладим. Одамлар машина билан бориб чуқурчага тош ота бошлади. Шундан сўнг чуқурликдан айиқ чиқди. Мен қизиқиб томоша қилишга канал ёқасига бордим. Каналдан ўтолмайди деб пастликка тушиб турган эдим, отилиб чиқдида мен томон югуриб қувлай бошлади. Жуда яқин келди, етиб олишига сал қолди. Жон ҳолатида қочдим”, — дейди Ҳалима Ортиқованинг қизи Малоҳат Исмоилова.
Қишлоқ аҳолисининг қўшимча қилишича, айиқ қишлоқ одамларидан бирининг, тўғрироғи уни машинада қувлаганларнинг уйида яширинча сақланган. Ва хонадондан қочиб чиққан.
Оломон таъқибидан қочган айиқ жарликлардан ҳосил бўлган ғорга кириб олган. Кўп ўтмай туман ИИБ бошлиғи топшириғига кўра, отиб ташланган.
Изоҳ (1)
Кандай йовойилик!