Сенатнинг ўттиз тўққизинчи ялпи мажлисида Ўзбекистон ва Озарбайжон ҳукуматлари ўртасида ҳарбий соҳада ҳамкорлик ҳамда ҳарбий-техникавий ҳамкорлик тўғрисидаги битимларни ратификация қилишга оид қонунлар кўриб чиқилди. Бу ҳақда парламент юқори палатаси матбуот хизмати хабар берди.
Мажлисда сенаторлар ўзбек ва озарбайжон халқлари ўртасидаги дўстлик ришталари чуқур тарихий илдизларга эга эканини, маданий-маънавий қадриятлар, анъаналар ҳамда тарихнинг кўп асрлик муштараклигига асосланганини алоҳида таъкидлаган.
Сенаторлар ратификация қилиш учун тақдим этилган битимларни юқори баҳолаб, Озарбайжон ва Ўзбекистон ўртасида мудофаа соҳасидаги ҳамкорлик икки давлат армияларининг мудофаа қобилиятини янада мустаҳкамлаш ва салоҳиятини оширишга хизмат қилишини таъкидлаган.
Шунингдек, ушбу битимлар Озарбайжон президенти Илҳом Алиевнинг Ўзбекистонга давлат ташрифи доирасида имзоланган ва ҳарбий, ҳарбий-техникавий, ҳарбий-таълим соҳасида, шунингдек, томонлар манфаатлари кесишадиган бошқа соҳаларда икки томонлама ҳамкорликни ривожлантиришга қаратилгани қайд этилган.
Сенаторларнинг фикрича, битимларнинг қабул қилиниши икки томонлама муносабатларни ривожлантиришга янгича туртки беради ва минтақавий хавфсизликни мустаҳкамлашга хизмат қилади.
Қонунлар сенаторлар томонидан маъқулланган.
Аввалроқ Ўзбекистон ҳарбий шифокорлари Жанубий Кореядаги халқаро курсларда малака ошириши, Ўзбекистон армияси дунёдаги энг кучли армиялар рейтингида 62-ўринни эгаллагани тўғрисида хабар берилганди.
Изоҳ (0)