Раҳимжон Бобоев Сирдарё вилояти ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари — вилоят иқтисодий тараққиёт ва камбағалликни қисқартириш бош бошқармаси бошлиғи лавозимига тайинланди. Бу ҳақда вилоят ҳокимлиги матбуот хизмати хабар берди.
Раҳимжон Бобоев бугунга қадар Алкогол ва тамаки бозорини тартибга солиш ҳамда виночиликни ривожлантириш агентлиги директори сифатида фаолият юритиб келаётган эди.
У 1976 йили Сирдарё туманида туғилган. 1999 йилда Тошкент давлат иқтисодиёт университетини тамомлаган. Маълумоти бўйича мутахассислиги — менежмент, бошқарув менежменти. Бобоев меҳнат фаолияти давомида “Ўзвиносаноат-холдинг” холдинг компанияси Молия ва бухгалтерия ҳисоби бошқармаси бошлиғи, Боёвут ва Ховос туманлари ҳокими лавозимлари фаолият юритган.
2022 йил ноябрда Шавкат Мирзиёевнинг тегишли фармони билан Акмал Маҳмудалиев зиммасига Сирдарё вилояти ҳокими вазифасини бажариш юклатилган. Вилоятнинг ундан олдинги ҳокими Ғофуржон Мирзаев эса президентнинг давлат хизмати, аҳоли билан мулоқот ва маҳаллий ҳокимият органлари фаолиятини мувофиқлаштириш масалалари бўйича маслаҳатчиси лавозимига тайинланганди.
Аввалроқ Анвар Орипов Сурхондарё вилояти ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари лавозимига тайинлангани, Бахтиёр Раҳмонов яна Тошкент ҳокими ўринбосарлигига қайтгани тўғрисида хабар берилганди.
Изоҳ (0)