Қамоқхонадаги Грузиянинг собиқ президенти Михаил Саакашвилининг саломатлиги кескин ёмонлашди. Сиёсий маҳбус Politico нашрига ёзган мақоласида у ҳозир ҳаёт-мамот ёқасида эканини айтди.
“Саккиз йиллик сургундан сўнг 2021 йил октябрда эркин ва адолатли парламент сайловларини қўллаб-қувватлаш учун Грузияга қайтганимда, 54 ёшли соғлом ва бақувват одам эдим. Кейин мени Грузия расмийлари зудлик билан ҳибсга олди ва ўшандан бери миш-мишлар ва сиёсий сабабларга кўра ваколатни суиистеъмол қилиш айбловлари асосида қамоқда ўтирибман.
Буни фақат Кремль ва Грузиянинг амалдаги ҳукумати қонуний деб билади. Қамоқда ўтирганимда эса соғлиғим кескин ёмонлашди. Мен ҳозир ўляпман”, — деди собиқ сиёсатчи.
Саакашвили қамоқда бўлганида унга қандай муносабатда бўлишганини ҳам айтиб берди. Жумладан, кимёвий қийноқлар қўлланганилганини қўшимча қилди.
“Мен мунтазам равишда жисмоний ва руҳий қийноқларга дучор бўлдим ва ҳозирда танамда оғир металлардан заҳарланиш аломатлари бор. 20 дан ортиқ оғир касалликлардан азият чекяпман, уларнинг барчаси қамоқда ўтирганимда пайдо бўлган”, — деди у.
Грузия собиқ президентининг фикрича, унинг ўлими Кремль режимининг ғалабаси бўлади.
“Менинг ўлимим Грузияда сиёсий бетартибликни келтириб чиқариши мумкин, аммо қийноқда ўлишим шубҳасиз Путиннинг ғалабаси сифатида кўрилади – бу минтақадаги ва, эҳтимол, дунёнинг Россия империализмига қарши тура олмайдиган барча етакчилар учун қудратли рамзга айланади”, — деди Саакашвили.
Саакашвилини Грузияда ҳибсга олиш ва қийноқлар
2021 йил 1 октябрда Саакашвили саккиз йил ичида биринчи марта муниципал сайловлар арафасида Грузияга қайтганида ҳибсга олинган. У бир қанча жиноий ишларда, хусусан, 2005 йилда грузиялик собиқ депутат Валерий Гелашвилига ҳужум уюштирганликда айбланмоқда. Бунинг учун у аллақачон сиртдан олти йиллик қамоқ жазосига ҳукм қилинган.
Ҳибсга олингандан сўнг Саакашвили дарҳол очлик эълон қилган ва у 2021 йил 19 ноябрда очликни тўхтатишга рози бўлган. 29 ноябрь куни Саакашвили ҳибсга олинганидан кейин биринчи марта судга олиб борилган ва ҳибсда қийноққа солинганини айтган. У ўзига қўйилган айбловларни сиёсий таъқиб, ўзини эса сиёсий маҳбус деб билади.
Узоқ давом этган очлик эълонидан сўнг сиёсатчининг аҳволи оғирлашган, шу сабабли у Рустав қамоқхонасидан Горидаги ҳарбий госпиталга ўтказилган.
2022 йил декабрида Украина Ташқи ишлар вазирлиги ўша пайтда Тбилисидаги Vivamedи тиббиёт марказида бўлган Саакашвилининг соғлиғи сезиларли даражада ёмонлашганидан чуқур хавотирда эканини билдирган.
2023 йилнинг 1 февралида Украина президенти Владимир Зеленский Грузия ҳукумати Саакашвилини “омма олдида қийноққа солиб, ўлдираётганини” айтди. Саакашвилининг ўзи эса Украинадаги уруш ғалабасигача яшай олмаса, юрагини Киевга дафн этишга чақирди.
Изоҳ (0)