Келаси ҳафта Ерни магнит бўронлари қоплайди. Бу ҳақда сунъий йўлдош тизимлари ва дунё бўйлаб илмий халқаро метеорология лабораториялари маълумотларидан фойдаланган ҳолда онлайн прогнозни амалга оширувчи Meteoagent хабар берди.
Апрелнинг 10 ва 11 санасида об-ҳавога сезгир одамлар магнит бўронларидан эҳтиёт бўлиши керак бўлади. Прогнозга кўра, икки кун давом этадиган магнит бўрони кучи салбий, яъни К-индексида 4 даражани ташкил қилади.
Магнит бўрони нима?
Бу Қуёшдаги чақнашлар натижасида сайёрамиз геомагнит майдонининг бузилиши саналади. Бу жараёнлар об-ҳавога сезгирлар, кексалар ва сурункали касалликларга чалинган одамларнинг соғлиғига салбий таъсир қилади. Магнит бўрони салбий таъсирининг энг кенг тарқалган кўринишлари қуйидагилар:
- бош айланиши ва бош оғриғи;
- уйқу бузилиши;
- диққатни жамлаш билан боғлиқ муаммолар;
- қон босимнинг бузилиши;
- сурункали касалликларнинг кучайиши;
- оғриқлар, шунингдек, бўғимлардаги оғриқ;
- иштаҳа бузилиши ва кўнгил айниши;
- ҳолсизлик.
Бундай кунларда организмга ёрдам бериш учун кунига камида 7-8 соат ухлаш маслаҳат берилган. Қаҳва миқдорини камайтириб, ўсимликлардан тайёрланган чой истеъмол қилиш керак. Шунингдек, контрастли душ, эрталабки машқлар, тоза ҳавода юриш, югуриш магнит бўрони фонида саломатликни яхшилашга ҳисса қўшади.
Изоҳ (0)