“Украина Қримни қайтаришга уринса, Россия ядро қуролидан фойдаланиши мумкин” — Медведев

Россия Хавфсизлик кенгаши раиси ўринбосари Дмитрий Медведев агар Украина Қримни деоккупация қилишга уринса, Россия ядро қуролидан фойдаланиши мумкинлигини айтди. Бу ҳақда “ТАСС” хабар берди.

“Агар Қримни қайтариб олишга уриниш билан боғлиқ баъзи жиддий ҳужумлар ҳақида гапирадиган бўлсак, бу барча ҳимоя воситаларидан, жумладан ядровий тўхтатиб туришнинг асосий доктринасида назарда тутилганлардан фойдаланиш учун асос бўлади. Россияга қарши ҳар қандай қурол турларидан фойдаланиш ўша давлатнинг мавжудлигига таҳдид солади”, — деди Медведев.

У “давлатнинг бир қисмини бўлиб ташлашга уриниш бу давлатнинг мавжудлигига тажовуз эканини англатишини” билдирди.

“Шунинг учун, ўзингиз хулоса чиқаринг: ҳар қандай қуролни қўллаш учун аниқ асослар бор. Умид қиламанки, океаннинг нари томонидаги ‘дўстларимиз’ буни тушунади”, — деди Хавфсизлик кенгаши раиси ўринбосари.

Шунингдек, Медведев Украинанинг Қримни қайтариш ҳақидаги баёнотлари асосан “ташвиқот” эканини қайд этди.

Эслатиб ўтамиз, аввалроқ Украина президенти Владимир Зеленский Россия агрессияси тўққиз йил аввал Қримдан бошланганини, Қримни қайтариш орқали тинчлик тикланишини айтганди.

“Бу бизнинг еримиз. Бизнинг халқимиз. Бизнинг тарихимиз. Украина байроғини Украинанинг ҳар бир бурчагига қайтарамиз. Қрим озод бўлади!” — деган Зеленский.