АҚШнинг 42-президенти Билл Клинтон 1994 йилда Украина ҳукуматини Совет ядро арсеналидан воз кечишга кўндирганидан афсусда эканини айтди. Бу ҳақда Клинтон Ирландиянинг RTE телерадиокомпанияси эфирида гапирди.
“Мен шахсан жавобгарлик ҳис қиляпман, чунки уларни (Украина) ядровий қуролларидан воз кечишга кўндиргандим. Улар Украинада ядровий қурол бўлганида, Россия ҳозирги найрангини бошламаган бўларди, деб ҳисоблайди”, — деди Клинтон.
У Россия президенти Владимир Путин ядровий қуролдан воз кечиш эвазига Украина хавфсизлигини кафолатловчи келишувга риоя қилмаётганини таъкидлади. Клинтон ушбу шартномани Россия ва Украина президентлари Борис Ельцин ва Леонид Кравчук билан имзолаган эди.
Билл Клинтоннинг қўшимча қилишича, ўшанда Украина томони ядровий қуролдан воз кечишдан қўрққан, чунки улар бу мамлакатни Россия экспансиясидан ҳимоя қиладиган ягона нарса деб ўйлашган. “Президент Путин ўзига қулай вақт келганида уни (келишувни) бузди ва биринчи қилган иши Қримни эгаллаш бўлди. Мен бунинг учун ўзимни жуда ёмон қис қиламан чунки Украина жуда муҳим давлат”, — деди Клинтон.
СССР парчаланганидан кейин ядро қуроллари Украина ҳудудидан олиб кетилган эди. Украина мамлакат хавфсизлигини кафолатлаган Будапешт меморандуми доирасида ядровий мақомдан воз кечган. Меморандум Украина, Россия, АҚШ ва Буюк Британия томонидан имзоланган.
Изоҳ (0)