“Сунъий интеллект ривожланишини тўхтатиш муаммони ҳал қилмайди”. Билл Гейтс Илон Маск ва бошқа экспертларнинг чақириғига муносабат билдирди

Microsoft асосчиси Билл Гейтснинг Reuters агентлигига айтишича, илғор сунъий интеллект ривожланишини тўхтатишга чақириқлар “муаммони ҳал этмайди”. У сунъий интеллектни ривожлантиришни олти ойга тўхтатиб туришни таклиф қилган Илон Маск, Стив Возняк ва бошқа экспертларнинг очиқ хатига шундай муносабат билдирди.

Гейтснинг сўзларига кўра, сунъий интеллект технологияси инсониятга фойда келтиради, шунинг учун Microsoft асосчиси унинг ривожланишини тўхтатиб туриш зарур, деб ҳисобламайди. “Шубҳасиз, бу (технология) кўп фойда келтиради, биз қиладиган иш — баҳсли соҳаларни аниқлаш”, — деди тадбиркор.

Гейтс очиқ хат муаллифлари томонидан илгари сурилганидек сунъий интеллект ривожланишини қандай қилиб тўхтатиш мумкинлигини тушунмаётганини таъкидлади. “Мен ҳақиқатан ҳам тушунмаяпман, айнан ким, уларнинг фикрича, сунъий интеллект ривожланишини тўхтата олади, барча мамлакатлар бунга рози бўладими, ўзи умуман нега бундай қилиш керак?” — деди у.

Билл Гейтснинг сўзларига кўра, бундай ечимни амалга ошириш қийин, шунинг учун у мутахассисларга асосий эътиборни сунъий интеллект имкониятлари ва улардан қандай қилиб энг яхши тарзда фойдаланиш мумкинлигига қаратишни таклиф қилди.

Март ойида Tesla бош директори Илон Маск, Apple асосчиларидан бири Стив Возняк ва мингдан ортиқ экспертлар умумий хавфсизлик протоколлари жорий этилгунга қадар илғор сунъий интеллектни ривожлантиришни камида олти ойга тўхтатиб туришга чақирувчи очиқ хатни имзолаган эди. Мактуб муаллифларига кўра, бу технология инсониятга хавф туғдиради, чунки “кучли рақамли интеллект”нинг ҳатто яратувчилар ҳам уларни бошқара олмайди ва замонавий сунъий интеллект тизимлари одамлар билан рақобатлаша бошлайди.

Мактуб чоп этилишидан бироз олдин Microsoft томонидан молиялаштирилган Америка IT-компанияси OpenAI ChatGPT асосини ташкил этувчи генератив сунъий интеллект тили моделининг янги версияси бўлган GPT-4 ни тақдим этган.