Индонезия полициясининг террорга қарши кураш бўлими Денсус 88 тўрт нафар Ўзбекистон фуқаросини ижтимоий тармоқларда террор ташвиқотини тарқатганликда айблаб қўлга олди. Индонезия полицияси бригадаси матбуот котибининг айтишича, ўзбекистонликлар “Катиба Тавҳид вал Жиҳод” халқаро террор ташкилотига алоқадорликда гумон қилинмоқда.
Гумонланувчилар Б.А. 32 ёшли, О.М.М 28, Б.К.А 40 ва М.Р. 26 ёшли кишилар экани маълум қилинди. Улар Индонезияга Истанбулдан келишган ва мамлакатга Малайзия орқали киришган. Ўзбекистонликларнинг икки нафари 2023 йилнинг 6 февралида Индонезияга жўнаб кетган, қолганлари эса уч ҳафтадан сўнг 27 февраль куни Индонезияга етиб борган.
Дастлабки тергов натижаларига кўра, Б.А, О.М.М ва М.Р Яқин Шарқ минтақасида, хусусан Сурияда фаол бўлган халқаро террор ташкилоти аъзоси. Бошқа бир гумонланувчи Б.К.А эса уларга молиявий ёрдам ҳамда сохта ҳужжатларни тақдим этиб келган.
Хабарга кўра, Б.А 2021 йилда ташкилот директори бўлган ва Ўзбекистондан Туркияга жўнаб кетган. Шундан сўнг у Суриядаги жангарилар лагерига жўнатилган.
Б.А Туркияда бўлганида радикал ташвиқотни тарқатган. Хабар қилинишича, у терактларни амалга ошириш ниятида бўлган “Катиба Тавҳид вал Жиҳод” гуруҳи аъзоларини қабул қилиш ва уларни тегишли жойларга етказиш билан шуғулланган.
“Ҳозирда Ўзбекистон Ички ишлар вазирлиги унга нисбатан радикал мафкура тарғиботи бўйича жиноий иш қўзғатган”, — деди Индонезия полицияси генерали Аҳмад Рамазон.
“Катиба Тавҳид вал Жиҳод” тарафдори О.М.М Суриядаги гуруҳ раҳбариятининг буйруғи билан 2020 йилда Сурияга кетгани хабар қилинди. Айтилишича, у лагерда қўпорувчилик терроризм бўйича машғулотларни тамомлаган ва гуруҳ фаолиятида фаол иштирок этган.
М.Р эса 2020 йилда “Катиба Тавҳид вал Жиҳод” директори сифатида Сурияга жўнатилган, 2022 йилда эса Иордания пойтахтида терроризм бўйича ўқув машғулотларини тамомлаган.
Денсус 88 тўрт нафар гумонланувчига тегишли бўлган маҳаллий ва халқаро паспортлар, пул ўтказмаси маълумотлари, авиачиптага буюртма, бир нечта уяли телефонлар ва ташвиқот материалларининг “скриншотлари” кўринишидаги далилларни олди.
Денсус 88 катта комиссари Асвин Сирегарнинг айтишича, ўзбекистонликлар ҳали ҳибсга олинмаган.
“Айни пайтда улар ҳибсга олингани йўқ. Биз ҳозирча алоқадор томонлар билан ўз ҳаракатларимизни мувофиқлаштирмоқдамиз”, — дея қўшимча қилди у.
Изоҳ (0)