Украина президенти Владимир Зеленский ўзининг Telegram каналида 2014 йилда Симферопол (Қрим марказидаги шаҳар)да Қрим парламенти биноси ёнида бўлиб ўтган митингга бағишланган пост жойлаштирди. Ўшанда украинапараст фаоллар Қримнинг Украинадан ажралиб чиқишига қарши чиққанди.
“Россия агрессияси тўққиз йил аввал Қримдан бошланганди. Қримни қайтариш орқали биз тинчликни тиклаймиз. Бу бизнинг еримиз. Бизнинг халқимиз. Бизнинг тарихимиз. Украина байроғини Украинанинг ҳар бир бурчагига қайтарамиз. Қрим озод бўлади!” — дейилади Зеленскийнинг постида.
2014 йилнинг 26 февралида россияпараст ва украинапараст фаоллар Симферополдаги парламент биноси яқинида кенг кўламли митингга тўпланишган. Иккинчи гуруҳга қрим-татар халқ мажлиси бошчилик қилган. Митинг иштирокчилари ўртасида тўқнашувлар бўлиб ўтган: ўттизга яқин киши яраланган, икки киши ҳалок бўлган. Акциядан бир ой ўтмай, Россия Қримни аннексия қилди ва Россия ҳукумати Қрим татарларини таъқиб қила бошлади.
2020 йилда Владимир Зеленский Украинада 26 феврални Қрим автоном республикаси ва Севастопол шаҳрининг ишғол қилинишига қаршилик кўрсатиш куни сифатида белгилаш тўғрисидаги фармонни имзолади.
Бир қатор украиналик ҳарбийлар ва ғарб экспертлари Украина 2023 йил давомида Қримни озод қила олади, деб ҳисобламоқда. Хусусан, Жануб оператив қўмондонлиги раҳбари Андрей Ковалчук бу ҳақда 2022 йил декабрда гапирган эди. Ўз навбатида, АҚШнинг Европадаги кучлари собиқ қўмондони генерал Бен Хожес Украина ёзгача Қримни озод қилиши мумкинлигини айтди, бироқ у ушбу мақсадга эришиш учун Ғарб давлатлари Украина Қуролли кучларига керакли барча қуролларни етказиб беришлари зарурлигини ҳам таъкидлади.
Изоҳ (0)