2022 йили Европада хусусий рейслар сони 64 фоизга кўпайиб, рекорд даража — 572,8 мингтага етди. Маълумотлар бугун, 30 март куни Greenpeace ташкилоти томонидан эълон қилинди.
Greenpeace доимий равишда самолётлардан чиқувчи газлар ортиб бораётганини таъкидлаб келади. Ташкилот маълумотларига кўра, 2022 йилда бизнес-жетлар деярли 3,4 млн тонна CO2 эмиссиясини ҳавога чиқарган.
“Хусусий самолётлар саёҳатининг хавотирли ўсиши фалокатнинг олдини олиш учун CO2 чиқиндиларини зудлик билан камайтиришимиз кераклигини айтадиган барча иқлим тадқиқотларига зид келади”, — дейди Greenpeace фаоли Клара Мария Шенк.
Greenpeace, шунингдек, 2022 йилда Европадаги барча бизнес-жет рейсларининг 55 фоизи 750 км дан кам бўлганини таъкидлаган.
Табиатни муҳофаза қилувчиларнинг фикрига кўра, масофалар бошқа яшил транспорт турлари билан осонликча босиб ўтилади. Энг машҳур хусусий самолётлар Париж—Лондон, Нитса—Лондон ва Париж—Женева йўналишида ҳаракат қилган.
Бизнес авиацияси бозори пандемия бошланиши билан оммалашди. Ўшанда турли чекловлар жорий этилган ва тижорат рейслари сони кескин камайган эди.
Изоҳ (0)