Дунёдаги энг катта хусусий нефть трейдери 2022 йилни рекорд даражада — 15 млрд доллар фойда билан якунлади

Дунёдаги энг йирик мустақил нефть трейдери — Vitol 2022 йилда 15 млрд доллар соф фойда олди. Бу ҳақда Financial Times (FТ) ўз манбаларига таяниб хабар бермоқда. 

15 млрд долларлик соф фойда компания учун рекорд кўрсаткич бўлиб, унинг аввалги олти йилдаги умумий фойдасига тенг.

Аввалроқ компания айланмаси қарийб икки баравар ошгани ҳақида хабар берган эди — 2021 йилдаги 279 млрд доллардан 2022 йилда 505 млрд долларгача.

Россия ва Украина ўртасида уруш бошланганидан сўнг нархларнинг кескин ошиши туфайли нефть компаниялари ўтган йили катта фойда кўрди. 

Trafigura, Glencore ва Меrcuria компаниялари ҳам аввалроқ рекорд рақамлар ҳақида хабар берган эди. Шу билан бирга, Vitol фойда бўйича рақобатчилардан анча ўзиб кетди. 

Витол компаниянинг фойдаси ҳақидаги FТ маълумотларига изоҳ беришдан бош тортди. Хусусий компания бўлгани сабабли у ўз фаолиятининг молиявий натижаларини расман эълон қилиши шарт эмас.