“Вимпелком” (Beeline бренди остида фаолият юритувчи) ўтган йил охирида Ўзбекистоннинг Buzton стационар интернет операторидаги 55 фоиздан ортиқ улушини “Ўзбектелеком” давлат операторига сотди. Бу ҳақда Россия компаниясининг 2022 йил учун молиявий ҳисоботига таяниб, “ТАСС” хабар бермоқда.
Ўзбекистон давлат оператори томонидан Buzton акциядорлик жамияти улушини сотиб олиш бўйича келишув ўтган йилнинг 30 декабрида тузилган.
Унга кўра, “Ўзбектелеком” Buzton’даги 55,37 фоизни “Вимпелком”дан сотиб олади. Шартноманинг бошқа тафсилотлари келтирилмаган.
Buzton — “Ўзбектелеком” компанияси ва Нидерландиянинг Veon телекоммуникация холдинги (VimpelCom’нинг бош компанияси) ўртасидаги қўшма корхона. 2009 йилдан бошлаб у “Билайн” бренди остида симли интернет ва телефон хизматларини тақдим эта бошлади.
2004 йилда Buzton’даги кўрсатилган улуш Golden Telecom гуруҳи, кейинчалик VimpelCom томонидан сотиб олинган ва 2021 йилда Россия уяли алоқа оператори қайта ташкил этиш натижасида унга тўғридан тўғри эгалик қилган.
Изоҳ (0)