15 апрелдан бошлаб Twitter’даги “Сиз учун” тавсия ёрлиғи фақат Twitter Blue’га фаол обуна бўлган фойдаланувчиларнинг постларини кўрсатади. Бу ҳақда ижтимоий тармоқ эгаси Илон Маск маълум қилди.
Тадбиркор, шунингдек, чекловлар сўровномаларда қатнашиш учун ҳам қўлланилишини айтди — уларда фақат пулли обунаси бўлган фойдаланувчилар овоз бериши мумкин.
Бу сунъий интеллектга асосланган ботларнинг тўдаси билан курашишнинг ягона йўли. Акс ҳолда бу умидсиз ютқазилган жанг, — деб ёзди Маск Twitter’да.
Twitter Blue — бу фойдаланувчиларга Twitter’ни ўз эҳтиёжларига мос равишда созлаш, премиум функциялардан фойдаланиш имконини берувчи ойлик пулли обуна.
Аввалроқ бутун дунё бўйлаб Twitter Blue’га обуна бўлиш имконияти пайдо бўлгани ҳақида хабар берилганди.
Январь ойидан бери Twitter Blue интернетда ойига 8 доллар, iOS ва Android иловаларида эса 11 доллар туради. Бундан ташқари, агар обуна бир йил учун сайт орқали олдиндан сотиб олинса, ойига 7 доллар туради.
Twitter Blue 2022 йил ноябрь ойида ишга туширилган. Машҳур шахслар ва компаниялар аккаунтларининг ҳақиқийлигини тасдиқловчи верификация белгиси учун тўлов жорий этилиши компанияни сотиб олган Илон Маскнинг Twitter’даги дастлабки қадамларидан бири бўлган.
Изоҳ (0)